Kum 2027 thleng north London club enkawl chhunzawm turin Mikel Arteta chuan Arsenal manager a nihna a pawtsei.
2003-04 season hnu lama league title sualchhuah tih ni reng reng nei thei tawh lo Gunners hian season kal lai tawp ruala a contract neih lai hmangzo ve tawh tur Spanish coach lakah rinna an la nghah chhunzawm ngam niin a lang a, a contract neih lai chu kum thum chhung atan an pawhseisak a, a hun hmaa rokhawlhna dangin a tlakbuak lote a nih chuan kum 2027 thleng an inruai leh rih dawn a ni.
Manchester City lama Pep Guardiola thachhangdawltu a nih laiin Arteta hi Arsenal-in an senglut kha a ni a, December 2019 khan a chipui Unai Emery thlakin Gunners boss nihna a chelh tan.
2019-2020 season tawp khan Arsenal chu FA Cup final-ah a chakpui a, kha kha manager a nih hnua a major trophy hlawhchhuah hmasakber a ni zui ta nghe nghe.
Pathianni zan hian Tottenham khelmualah north London derby an khel dawn a, league season kal lai khelh thum an khelh tawha tlawm la nei lo Arsenal hian palina luah mekin, an game hmasa pahnihah Wolves leh Aston Villa an hneh zawn thawt a, Brighton ber kher hneh zo loin an in draw a, tunah season thara fiahna lian hmasa an hmachhawn mek a ni.
Season liamta hnuhnung pahnihah khan Manchester City ve ve hmakhalh zo loin Arsenal khan Premier League-ah pahnihan an luah zawn a, 2003-04 season hnu lama an top-flight title hmasaber tur an beisei kal mekna kawngah kum 42 mi hian teuh deuh deuhin season hnuhnung pahnihah league a kharpui a, hmachhawp la neiah an ngaite pawh a ni mahna!
Football a khelh laia midfielder ni thin Arteta hian a playing career-ah Gunners tan match 150 khel tlingin, captain banhren a hreng bawk.