Tennis a ram leh ram mipa team inelna lian Davis Cup khelh mekah Great Britain chuan Finland an hneh a, group stage-ah hnehna an chang nghal. Great Britain rual hian champion tura rinkai Spain in hnehna an chang ve bawk.
Great Britain tan hian mimal inkhelah Dan Evans-a’n bul a tan a, 703rd-ranked Eero Vasa a hmachhawn. Evang hian a khingpui lakah bul a tan tha lo viau. Awlsawm takin a chak tura ngaih a ni naa set khatnaah tie-break khelh a ngai ringawt. Tie-break ah player langsar zawk Evans a chungnung hram a, harsat takin set khatna a la. Harsa taka set a lak hnuin set hnihnaah a khel tha ta viau thung a, break neiin zawnin game hnih a chiah a hloh a, Vasa lakah hian 7-6 (7-3) 6-2 in hnehna a chang a, Finland lakah 1-0 in hma an hruai phawt.
Geat Britain hian Finland hmachhawnin Group D-ah bul an tan. GB tan hian US Open semi-finalist Jack Draper-a’n bul a tan thei lo. Draper aiah hian kum 29 mi Billy Harris chuan bul a tan a, ani hian an match hnihnaah Otto Virtanen a hmachhawn. Harris hian a khingpui Otto Virtanen lakah a khel tha viau a, set hloh lovin hnehna a chang. Harris hian set khatnaah break pawimawh tak a nei a, game li hloh chungin set khatna a la. Set hnihnaah an inhnehtawk zui viau a, game an inlakchhawk zak zak hnuin tie-break an khel a, tie-break-ah hian Harris a chungnung zui leh a. A khingpui Virtanen lakah 6-4 7-6 (7-4) in hnehna a chang a, GB in hnehna chang chiang nghal turin 2-0 in hma an hruai.
Mimal inkhelah GB an chungnung a, an chak chiang nghal. Mimal inkhela an chak zawn hnuin double’s an khel chhunzawm a, Evans leh Neal Skupski te inkhawl chuan an Finland tana inkawp Virtanen leh Harri Heliovaa te inkawp an chu 7-6 (7-4) 7-5 in an hneh zo lova, 3-0 ngawta chak nghal an tumna an tipuitling zo ta lo a ni.
Group D-a lama inkhel dangah champion lai Canada an awm a, Argentina an awm bawk. Champion lai Canada hian Argentina hmachhawnin bul an tan a, 2-1 in hnehna an chang ve bawk. Canada tan hian Denis Shapovalov chuan a khingpui World No. 31 Francisco Cerundolo chu 7-5, 6-3 in a hneh a. No. 21 Félix Auger-Aliassime chuan a khingpui Sebastian Baez a hneh bawk. Hetihlai hian doubles lama inkawp Shapovalov leh Vasek Pospisil te inkawp chu Andrés Molteni leh Máximo González lakah an tlawm ve thung.
- Spain an chak
Group stage-a inkhel dangah champion tura rinkai Spain chuan Valencia khawpuiah Czech Republic an hmachhawn a, 3-0 in hnehna an chang.
Spain tan hian tunlai a player tha ber zinga mi Carlos Alcaraz chuan Tomas Machac hmachhawnin bul a tan. Grand Slam title pali la thei naupang ber Alcaraz hian Machac lakah bul a tan tha lova, set hloh hmasa zawkah a tang. Set khatnaah Alcaraz leh Machac te an inhnehtawk viau a, tie-break khelh a ngai nghal. Tie-break-ah Alcaraz tlawm zawkah a tang teh tlat a, set a hloh hmasa. Set a hloh hnuin a insiam tha a, set hnihnaah tha chungchuang taka inlanin game khat chiah a hloh. Set khat ve ve an lak hnuin Machac hi hliam vangin a inlan zui thei lova, Alcaraz hian 6-7 (3-7) 6-1 in hnehna a chang.
Mimal lama inkhel thawh hnihnaah Spain tana inlan Roberto Bautista Agut chuan a khingpui Jiri Lehecka chu 7-6 (7-1) 6-4 in an hneh ve bawk. Mimal inelnaah an chak zawn hnuin doubles lamah hnehna an chang zui leh a, fuh taka bul tanin 3-0 in an chak. Spain hi Group B-ah Australia, France leh Czech Reopublic te nen an awm tlang. Group B-a inkhel dangah Australia chuan 2-1 in France an hneh ve bawk.
Davis Cup 2024 Group stage-a inkhel dangah Italy in Brazil an hneh a, United States in an khingpui Chile chu 3-0 in Zhuhai lamah an hneh ve bawk.
Tarlan tawh angin Davis Cup hi Tennis hmanga ram leh ram mipa team inelna a ni a, Group Stage-ah hian ram 16 an inel a. Group pali-ah team li theuhin an awm a. Group khata titha pahnihin semi-final an lut ang.