England club lian pathum Southampton, Tottenham Hotspurs leh Chelsea manager hlui Mauricio Pochettino kha United States men’s team head coach thar atan lakluh a ni.
Argentine coach hian kumin July thla maia an petchhuah tak Gregg Berhalter a thlak a; Copa America an thlen tuma group-stage a pelhpui zawh loh hnuah Berhalter an ban a, England lama tawnhriat ngah tawh Pochettino an rawih tur thu hi tunhnai Cincinnati lama international friendly game-a New Zealand nen 1-1-a US an inhnehtawk hma lawk khan an nemnghet ta a ni.
Kum 52 mi Pochettino chuan USA head coach ni tura hawn remchang an hawnsak chu a tan bawhpelh mi rual a nih loh thu sawi chungin US Soccer team zawm tura thutlukna a siam chhan chu he team-in hlawhtlinna sualchhuak tura duhna, tumna tak tak leh riltam huam huamna an neih vang a nih thu a sawi a, talent leh remchanna hrang hrang a hmuhte avangin a phur hle tih a tarlang tel.
US Soccer sporting director Matt Crocker hoin Berhalter thlaktu zawn hna kha ngawrh taka kalpui niin, St Mary’s-a hna a thawh laiin Pochettino kha Southampton khuaah an va chamchilh hial a ni.
Crocker chuan an manager thar chu hnehna chang dawklak (serial winner) tiin a fak a, player-te hmasawnna zawng tlat mi, team inlungrual leh competitive rilru pu tlat dinchhuah duh mi niin a sawi.
Pochettino hian Espanyol atangin Southampton a pan a, chu tah Tottenham zawm lehin, Spurs chu rin loh takin 2019 Champions League final a thlenpui.
England atangin Paris St-Germain lama a insawn a, chu ta tangin London-ah bawk kirlehin Chelsea a enkawl a, kumin May thla mai khan season khat lek hnuah Premier League lama parukna a nihpui Blues a chhuahsan a, tunah America lamah a kal leh ta a ni.
United States hi Canada leh Mexico-te nen 2026 World Cup thlengtu tur an nih miau avangin Fifa tournament lian an thlen tur avang pawh hian manager rintlak an mamawhna a sang zual tura ngaih a ni.
USA hi Fifa ranking-ah 16-na ni mekin, an chung chiahah Euro 2024 quarter-finalists Switzerland an awm.
Pochettino an lakluh leh tak hnu hian US mipa leh hmeichhe team chu Chelsea boss hlui ve ve hnuaiah an awm ta tihna a ni a, hmeichhe team enkawl tur hian kumin kumtir lam khan Emma Hayes lakluh a lo ni tawh a ni.