International break a zawh hnuin inrinni zan khan English Premier League 2024-25 khelh chhunzawm a ni. Inrinni zana inkhelah champion lai Manchester City in hnehna an chang a, season tharah an chak tluang zel. Champion lai Manchester City an chak laiin vawi thum chak zawn tawh Liverpool chu an mikhual Nottingham Forrest lakah an tlawm ringawt thung. Inrinni zana EPL result langsar zual kan hrut kual thuak huak ang.
- Haaland leh bawk
Champion lai Manchester City chuan Etihad Stadium-ah season thara bul tan tha Brentford an mikhual a, goal chhuah hmasa zawkah an tang. Etihad Stadium-a lenglut Brentford tan hian Yoane Wissa chuan City tlarhnung tihsual a hrem a, inkhel tan atanga minute khatna lekah awlsam taka tauh goalin hmahruaina goal a thun. EPL season kal meka goal lut rang ber hian Manchester City muthlu a kai harh a, goal an chhuah hnuin Pep Guardiola team te hi thothang tha zawkin an inlan.
City hian an si phurh sut ngei tumin tan an khawh a, goal pawh an thun har lo. Season tharah goal 7 ngawt thun tawh Erling Braut Haaland chuan box chhunga hlauhawm bik a nihzia a lantir a, chep tak karah tha zeta inher thutin lei hrulah mawi takin a pet goal a, minute 19-naah goal thunin an si phurh a sut.
Goal khat ve ve an thun hnuin Manchester City an khel tha lehzual a, an khingpuite an nawr na zui hle. City si nghak Ederson chuan hla taka awm Haaland tan fuh zetin a siam. Haaland hian chak taka um lutin minute 32-naah hma an hruai letna goal a thun. Minute 32 chhung leka goal hnih a thun hman vangin an khelh hnuhnung pahniha hattrick siam zawn tawh Haaland hian hattrick a siam nawn leh a rinawm hman hle. Haaland hian a zawna vawi thum hattrick siam theihna hun remchang a nei a, goal post a pet per dawp bakah a pet tha tak chu Brentford si nghak Mark Flekken chuan a lo dansak hlauh bawk a, uiawm takin hattrick siam zo lo. Haaland goal hnih thun hmangin City hian 2-1 inhnehna an chang zui ta a ni.
EPL-ah vawi li champion zawn thei hmasa ber City hian season tharah bul an tan tha viau a, vawi li khel tawhin an la chak vek a, vawi li chak zawn thei awmchhun an ni mek. City hian season tharah goal 11 an thun tawh a, heng zinga goal 9 zet hi Haaland thun a ni nghe nghe a. City tana goal thuntu chu Haaland leh bawk tih a ngai zui zel.
- Liverpool an tlawm
Manager thar Arne Slot hnuaia bul tan tha, vawi thum chak zawn tawh Liverpool chuan Inrinni zan khan Anfield-ah season thara tlawm la nei lo Nottingham Forrest an mikhual a, mak tak maiin an mualah an tlawm teh tlat. Liverpool laka Nottingham Forrest chakna goal hi minute 72-naa Callum Hudson-Odoi thun a ni. Anfield-ah ngei hnehna an chang hi panganaa inhlangkai Nottingham Forrest tan hnehna lian leh hnehna hlu bik a ni ngei ang.
- United leh Chelsea an chak
Season thara bul tan tha lo, khelh thum atanga vawi hnih tlawm tawh Manchester United chuan inrinni zan khan hnehna an chang a, St. Mary’s Stadium-a an khingpui Southampton chu si thum faiin an hneh.
Chak mamawh Manchester United tan hian Bayern Munich atanga an lak luh Matthijs de Ligt chuan minute 35-naah hmahruaina goal a thun. De Ligt goal thun hnu hian United an khel tha chhunzawm a, season thara bul tan tha lo Marcus Rashford chuan minute 41-naah an goal hnihna a thun. United in si hnih faia hma an hruai laiin Siants player Jack Stephens hnawhchhuah a ni a, hei hian mualneitu Southampton dinhmun a tichhe leh zual. Si hnih faia hma an hruai reng hnuin United tan hian Alejandro Garnacho chuan hun pek belh minute 90’+6-ah goal thunin an chakna a nem nghet.
United an chak rual hian team lian Chelsea pawhin hnehna an chang ve bawk. Chelsea hian minute 86-naa Christopher Nkunku goal thun hmangin mualneitu AFC Bournemouth an hneh.
- Table hnuai berah Everton
Inrinni zana inkhel dangah season thara che chhe tak Everton an khel chhe nawn leh a, Aston Villa lakah tlawmin table mawngphah an luah nghet.
Season thara la tlawm vek Everton hi Aston Villa hmachhawn turin Villa Park-ah an leng lut a, Mimualah chak tum viau mah se an hlawhtling zo lo. Mualneitu Villa lakah hian Dwight McNeil leh Dominic Calvert-Lewin te goal thun hmangin si hnih fai ngawtin hma hruai hman mah se Villa hian Ollie Watkins goal hnih leh Jhon Durán goal khat hmangin an chhanglet a, an mualah hnehna chang letin, Everton an tlawm nawn leh ta a ni.