September 13, Zirtawp zan khan India tualchhunga football club te inelna lian leh ngaihhlut hlawh ber Indian Super League 2024-25 season khelh tan a ni a, inkhel hmuhnawm takah Mohun Bagan Super Giant leh an mikhual Mumbai City FC te 2-2 in an inhnehtawk.
Kolkata khawpuiah season liam taa ISL League champion Mohun Bagan in ISL play-off champion Mumbai City FC an mikhual a, team lian pahnih an inhmachhawn nghal hian ISL season tharah boruak a siam lian nghal hle. Inkhel ngaihven hlawh takah hian mualneitu Mohun Bagan in bul an tan tha viau a, chawlhlawk hmain goal hnih an thun hman.
Inkhel tan atanga minute 8 na lekah Mumbai City FC player Tiri chuan an lamah a ti-goal a, Mohun Bagan hmahruaina goal a thunsak. Tiri goal thun hnu hian Mohun Bagan tan Alberto Rodríguez chuan minute 28-naah an goal hnihna a thun zui leh a, si hnih faiin hun rei tak chhung hma an hruai.
Mohun Bagan lakah rei tak si an phurh hnuin captain Lallianzuala Chhangte leh a nauten na takin an khingpuite an bei let a, hun tawp dawn hnaih lamah goal hnih thunin team lian lakah tlawm an pumpelh. Mumbai City FC tan hian an lama ti goal tu Tiri chuan minute 70-naah goal thunin an si phurh a sut then a. Hun pangngai dawn ruai minute 90-naah Thaer Krouma chuan goal thunin an si phurh a sut zo. 2-2 a nih hnuin hun pek belhah goal dang a luh belh thei tawh lo va, champion lai Mumbai City FC chuan Mohun Bagan Super Giant lakah tlawm an pumpelh hram a, point khat hlu tak an hmu.
Pathianni zan khan inkhel pahnih a awm chhunzawm leh a, Odisha FC chu an mikhual lakah an tlawm a. Hetihlai hian Bengaluru FC chuan an mikhual SC East Bengal an hneh ve thung. Odhisha FC hian an mikhual Chennaiying FC lakah bul tan tha viau mah se Farukh Choudhary goal hnih leh Daniel Chukwu Chima goal khat thun hmangin mikhual team Chennaiyin FC in hnehna an chang let. Pathianni zana inkhel dangah Vinith Venkatesh goal thun hmangin an mikhual East Bengal an hneh ve thung.
ISL season tharah hian Mizo player 36 zet an awm dawn a, he thu buatsaih lai thlen hian ISL team 12 zingah kai thar Punjab FC-ah chiah Mizo player an awm lo. ISL club zingah Mizo player awm tamna ber chu Mohamedan SC an ni a, Mizo player 7 an awm mek a, Haderabad FC-ah Mizo player paruk an awm bawk.