- K. Hmingthankaia
Mithiam tak takte hian ruahtui khawl tul zia hi an sawi chamchi a. Ruahtui khawl nachang kan hriat loh avanga tuia harsatna tawk leh si thin nia min chhal hian thenkhatte phei hi chuan, Mizo chhungkaw tinte hi min hau hrep thin ni ber hian a hriat thin. Nimahsela, kei hi chuan vawi tam tak ka ngaihtuah hnu pawh hian, kum khat tla tur emaw, thal laia tuia kan buai loh deuhna tur khawp ruahtui khawl dan tur hi ka hrechhuak zo ngang lo a ni e.
Mizoram, abik takin tui indaihlohna leh harsatna hmun Aizawlah hian, In insi khupin kan khawsaa, chutah pawh building khatah chhungkaw engemawzat kan la cheng zui a ni. Kar hnih khat tla tur tui dahna tur hi chu, chep tak leh rem lo chung chung pawhin chhungtin hian kan dah hram hram hlawm a ni. Thenkhat thla hnih khat daih dahna nei pawh an awm ang. Chung kan tuizemah chuan fur lai na na na chuan, harsa deuh chung chung leh buaithlak deuh pawhin ruahtui chu lo dahlut thei pawh ni ila, rei hman daih a ni chuang si lo.
Hun rei tak daih tur tuizem dahna tur hmun lah hi kan nei lo theuh mai bawk si a. Lei hnuaiah tuizem lian deuh nei theuh turin chhungtin tan a ngaihna a awm si lo. Inchung zawl nei zau deuhte hian an inchung khatin tuizem dah rawh se, an ti nge, an inchung chu tuizemah siam rawh se, an ti zawk ni ang aw? Chhungtin hian inchung zawl zau deuh kan nei vek si lo, a nei pawhin tuizema tihkhah vek chi a ni ngawt bawk si lo. Lo tikhat pawh nise, engtin nge ruahtui an thun ang? Lo thun pawh nise, inchung pakhat zawl ami ringawt chu rei tak daih a ni chuang lo ang. Engtia han khawl tur chu ni ang maw… Lammual te hi puipun nan hmang tawh lovin, fur laia ruahtui khawl nan kan hmang tawh mai dawn em ni? Chu pawhin rei a daih angem? Ka va buai em..
Ruahtui khawltu tur leh khawl thei ber tur chu Sawrkar hi niin ka hria. Aizawl dai hnai deuh leh hla deuh, chhim leh hmar, chhak leh thlanga awm, hmun ruam awl lai la awm apiang, kawrte tuiin a fin theih zawng zawng hi nasa takin, a zau thei ang berin khuap li leng lung thleh thluah sela, thal tui van hunah mipui hnenah sem sela kan ziaawm deuh mahna, chu chu a kawng awm chhun ni berin ka hria. Chutiang tur deuh chu tunah pawh hian Sawrkar hian hmun hnih khatah buaipui tlatin ka hria, ka hresual mai thei bawk.
Mi hausa thenkhat, in leh lo nei tha, hmunhma nei tha mi tlemte te chuan, fur ruahtui emaw, ruahtui lo emaw, kum hnih khat tla tur dahna nei chu an awm mahna. Nimahsela, Zoram mipui zawng zawng, abikin Aizawl ami zaa sawmkaw chuang hi chu chutiang ti thei dinhmuna ding kan ni lo tih hi chu heng mithiamho hian an hre tho awm si a, engtia khawl tur chuan nge min tih tak ang le?
Ruahtui khawl nachang kan hriatloh avanga mipui min hau thintute khan, ruahtui khawl dan min han hrilh ula, kan theih ang angin zawm kan lo tum dawn nia.