- Reuben Lalnunthara Hnamte
Mizo tawnga Chhungkaw kehchhia tih aim ah hian a saptawnga Broken family han tih hian kan sawi tum hi a tichiang zawk maithei a. Kan rama nupa inthenna tam lutuk leh India ram angah pawha a pakhatna tih hiala sawi ngam kan ni a, kan hmingthanna hi a tha lem lo hle. Nupa inthenloh a chhungkaw nuam tak leh hlawhtling din tluka ropui chu a awmloh rual rualin, nupa inthen lo thei lo te pawh an awm ve tho mai. Mi hlawhtling tak tak lo chawrchhuak thenkhatte pawh hi nupa inthen kara nu emaw pa emaw chauhin a enkawl seilente an awm nual tho bawk. Aizawlah pawh hian nupa, a langa inrem lo anga pawn lama hriat si loh, mahse, in chukha hleithei lo, zanah pawha mu dun ngailo hi an awm nual a. A bikin milian deuh zingah hian an tam zamah maithei a ni. Tin, khawtlang pawhina an hriat, nupa inhau reng mai, thawm nei deuh reng mai thenawm khawvengte tan pawh a hriat ninawm khawpte pawh an awm nual thin. An nupa kha inthen kher lo mahse, an nupa inkar kha a kehchhe daih tawh a ni.
Heng chhungkaw kehchhia kan tih tamber hi chu inneih hmaa kan fimkhur tawk loh vang a ni fova; inhrechiang mang lova innei mai te, naupang lutuka innei te an ni fo mai. Tin, hmeichhia hian nawmsak an duh avanga sum leh pai nei deuhte han um mai hi an awm nual bawk. A pawimawh berah chuan Pathian hriatna leh Pathian rawn fo hi a ni. Inneihna hi nawmchenna mai a nilova, damchhung a nih bakah, fate neia, chhungkua din leh kan thlah turte thlenga la nghawng a nih avangin a bultanna hi fimkhur a tul hle a, uluk taka kawppui tur thlan hi a pawimawh hle a ni. Broken family han tih hian mizo tawng aimahin a fiah theih zawkna awm a. Vaihote pawh hi nupa inthen an awm mang lo kan ti thin na in, an chhungkaw nun hi a nuam vek lo a ni. Chhungkaw buai, nupa inngeih lo, inthat, an tam em em a, an hnamdana inthen a remloh rual khan, inthen silova chhungkaw kehchhia hi an tam khawp ang. Tunlai thalai zingah hnamdang tihdan entawn a, innei silova chengdun nupa anga awm pawh sawi tur an awm nual tawh a. Kan Bible chuan hei hi a phal hauh lo “ Inngaih bansan ula” (1 Thesolonika 4:3) tiin a lo sawi.
Tunlai thalai zingah “Its my life “ tih thu changchawia, mahni duh thu thu awm duhna anasa sawt hle. “ Kristian philosophy chu, mahni inphat, mahni inthunun, mahni inkhuahkhirh ania, setana philosophy chu, i duh angin nung rawh, i duh nei rawh, mi thuin awm suh, i nun ania i thu thu tih ani -Bob Jones chuan a lo ti a ni. Zanlaiah te pawh hian Aizawl khawpui chhungah thalai tam tak, haw na tur neilo, khawlaia riak mai mai hmuh tur tam tak an awm. An hmabak chu mipat hmeichhiatna hman leh ruihhlo ngawlvei a ni mai. Hnam changkang zawk, Pathian hre lo leh kum 18 an tlina mahni inchhuahsana mahni duh dan dan awm thin te tihdan lo lak tum ve phet hi ringtu intite ramah hian chin ve chi a ni lo. An hnam kalphung tha rinawmnate, an thianghlimnate leh a dang entawn tum mang silova a chhelai lo lak hi a vanduaithlak takzet a ni. keini chu mizo kan ni a, hnam tihdanphung kan nei a, tin, Kristian kan ni bawk a. Kan hnam tihdanphung leh kan kristiannate hi kan vawnnun tlat hi a pawimawh hle a ni. Kan hnam tihdan chu ni chiah lo mahse, chin thana kan lo neih tawh, chhungte hriat lem lova tlandun, inruk tih hi bansan a hun khawp mai. Chutih lai erawh chuan tul bik thil; palai vawi tam tak tira, chhungte inrem thei lo leh anmahni induh si karah chuan hriatthiamna sang tak chu a awm thei ang.
Chhungkaw kehchhia(broken family) kan tih hi nupa inthen an ni vek kher lo, nupa inthen lem lo pawh hian chhungkua hi a lo kehchhe viau thei tho mai. Ruihhlo ngai leh khawlaia awmna tur pawh nei lova, thalai vak vak thin kan tihte pawh hi nu leh pa inthen avang a ni kher lo. Tin, chhungkaw kehchhia kan tih hi pa in emaw a zu a duh leh ruihhlo a tih nasat avanga lo thleng pawh a ni vek bawk lo. Kohhran a inhmang tak nu leh pa, ringtu tha ni awm tak a lang zingah pawh hian chhungkaw kehchhia hi sawi tur tam tak a awm ang. A chhan ber chu nupa inremlohna, khawtlang leh thenawmte pawhina an hriat em em si loh hian a awm thei a. Nu emaw pa zawk emaw tlawm zawk thei hauh lo, sawisel tur zâwng reng mai karah hian naupangte hian zirtur tha an hmu tlem hle. Nu zawk lalna inchhung, pa thuneihna awm mang lo karah pawh hian chhungkaw nuam tak a awm mawh hle bawk. Chhungkua hi he khawvela kan vanram leh kan paradise a ni tlat a, naupangten chhungkua nuam an tih lova, nupa intaireng karah chuan engtinnge mi hlawhtling an chhuah theih tehlul ang ni.
A pawimawh ber chu chhungkaw din dawna uluk leh fimkhur a ni a, chhungkaw din hi hmanhmawh lutuk tur a nih loh rualin tlai lutuk pawh a awm thei tho mai. Kan ram sualna, thalaite zinga ruihhlo leh sex hmansualna, HIV pun tamna em em te pawh hi nupa inthenna avang a ni vek kher lova, nupa inthen lem lo, chhungkaw nuam lo leh chhungkaw kehchhia hi an lo tam em a ni. Hauhsakte, nawmsak te leh kan fate hrehawm kan hlauh luatah hian an nungchang kan tichhe der thei. Chhungkaw nawmsak duhluat avanga sum leh pai thianghlimlo lakluh lama intlansiakte hi bansan ila, kan thawhchhuah ngei hmang hian khawsa ila; kan fate tih nawmsak lutuk tum lo bawk ila tichuan chhungkaw hlimtak leh kehchhe tur tam tak kan veng thei ang. Tunlai naupang kum 2 atanga kum 10 inkar velte hi atna hri hian a tuam mek a. A chhan chu mobile an khawih nasat lutuk avangin an rilru a buai a ni. France, Sweden leh USA state thenkhatahte leh ramdang thenkhatah te pawh naupang social media hman an khap tan ta hial a nih hi. Kan Aizawl khawpuiah pawh hian heng naupang social media khawih nasa lutuk avanga buai hi buaipui tham an awm tawh a ni.
Ka fanu upa zawk, vairam hostela kan dah lai a a tawngkam hi ka theihnghilh thei lo, tihian min rawn bia a “ Pa kan thiante chu hausa tak tak an ni a, an chhungten sum tam tak an thawn a pawisa pawh an nei khawp mai. Mahse, kei chuan inhlawh tlemte hmanga intheih ang tawk tawka min chawm hi ka ngaihlu zawk “ a tih kha a ni. Kan chhungkaw sum lakluh chu a tlem pawh ni se, kan fate kan theih ang tawka kan enkawl leh, kan chhungkaw sum lakluhna an hriat vek hian anmahniah tumruhna a pe zawk fo thin. Nupa inthen hi a tha hauh lo, mahse, lohtheihloh thil a awm ve thei. A pawimawh ber chu chhungkaw kehchhia(Broken) family awm lo tura nu leh pate hian tan kan lak a, tlawm a ngaiha tlawm ngam, thiam zawk nih inchuh tlatna bansan a inremna hi a pawimawh ber chu a ni. Thinrim laia rilru leh tawngkam thununa, inremna siam thei hi, mi satliah lo chhinchhiahna a ni “ Cicero. Hei hi nupa karah pawh kan vawn nun reng a pawimawh hle a ni. Tunlaiah ruihhlo ngai hmangaih inti a, sum leh pai donation thawh hreh lem lo mi kan awm nawk a. Mahse, kan faten ruihhlo an ngai a, sual kawng an zawh a, ngaithei leh miah si lo, mahni in atanga hnawtchhuak ta mai leh tuithlar hialte pawh sawi tur kan awm ta nawk a ni. Kan fate hian kan inchhungkhur tluka hahchawlhna in leh rilru hahdamna tur an nei lo. Midang kut ai chuan I fate chu nangma inchhungkhur leh hmangaihna ngei hmanga I enkawl tluka hlu a awm lo. Hmangaihna leh duhsaknan nen, Pathian hnena bang lova tawngtai chungin I fate leh I chhungkua enkawl la, Pathian chuan a chhang ngei dawn che a ni.