Nimin khan Lalnghinglova Hmar, Minister of State, Excise & Narcotics etc. hovin BDO Conference Hall, Darlawnah Ruilhhlo do chungchang hmalak zel dan tur sawiho a inrawnkhawmna neih a ni a. He hunah hian Darlawn khawchhunga Sawrkar Department hrang hrang aiawhte, tlawmngai pawl (NGOs) aiawh te, Kohhran aiawh te leh Kohhran thalai pawl hrang hrang aiawh te an tel.
Excise Minister Lalnghinglova Hmar chuan Ruihlo do chungchanga sawrkar hmalakna hrang hrang te tarlangin, Darlawn khawtlangin Ruihhlo do an kalpui zelna turah sawrkarin theihtawp chhuahpui a inhuam thu a sawi a. Kohhrante hemi kawngah hian nasa lehzual zawka hma la turin a ngen.
Lalnghinglova Hmar chuan sawi chhunzawmin, zirna in – school leh college-ahte ruihhlo ti lo tura inzirtirna nasa zawk kalpui a ṭul a, zirtirtute pawh ṭan la thar leh turin a ngen. Ruihhlo do kawngah department hrang hrangte thawhhona a ṭul thu sawiin, “Ruihhlo do kawngah YMA chuan theihtawp chhuahin tha pawh an thawh hnem a, chutih rualin VC, Kohhran leh MHIP te pawhin ngaihtuahna thuk zawk kan senpui a ṭul. Hlawhtling tur chuan kil hrang hrang atanga thawhhona ṭha neih a ṭul a ni” a ti. Excise Minister hian Darlawn khawtlangin ruihhlo dona-a an hman atan Rs 10000/- (Cheng sing khat) a pe bawk a ni.
Meeting-ah hian kalkhawmte aṭangin Darlawn khawtlang leh a chhehvela ruihhlo leh ruihhlo ngai te dinhmun tarlan a ni a. Ruihhlo Do kawnga hmalakna awm mek leh harsatna an tawh hrang hrangte sawi chhuah a ni. Ruihhlo do kawngah Sawrkar, khawtlang leh Kohhran ṭanrual a ṭulzia te sawi ho a ni bawk.
Meeting hi N. Lalzarzova, Block Development Officer, Darlawn RD Block chuan a kaihruai a. Vanlalvura Ralte, Asst Commissioner, Excise & Narcotics pawhin Minister hi Aizawl atanga ṭawiawmin thu a sawi bawk a ni.