Zaithiam lar Miley Cyrus chu Grammy award a dawn phahna hla hit, ‘Flowers’ vangin buaina a tawk mek. 2012 kuma Bruno Mars hla, ‘When I Was Your Man’ hla copy-ah puhin, thubuai an siamsak.
Tempo Music Investments (TMI) chuan Miley an khinna chhanah heng hla pahnih te hian ianna leh inzulna an nei tam hle, an ti.
Bruno-a hla copyright share neitu TMI hian harmony, chorus, melody, chord progression leh hla thu thlengin tum reng vanga a ngial a nga a lakchhawn a ni, tiin an puh bawk.
Copyright infringement thubuaiah Bruno hi chu a khaipa a ni loh vangin a tel ve lova, TMI lamin thubuai an kalpui.
Kumin kumtir lam khan Miley hian, ‘Flowers’ hla lar tak hmangin a vawikhat nan Grammy award a dawng a, record of the year bakah best pop solo performance a hum haw.