- Zoliansanga Tlau
Khawvela kan cham chhungin hun pek theuh kan ni a. Hun hlutna hria te’n hlawk taka hmangin thil tha leh thil ropui tih nan, inzir nan hun an hmang thin a. Chung mite chu he khawvelah an cham rei theih chhung aia tawi chama mual an liam thuai a nih pawhin khawvela an mihringpuiteah thil eng emaw hnutchhiah tur an nei nual hman thin. Kaphleia, L. Biakliana, Lalzova Chhangte te kha khawvelah awm rei vak lo mah se, thu leh hla tha tak tak an hnutchhiah nual hman a nih kha. Kaphleia’n “Kan dam rei leh rei loh te hi kum te, thla te hian a hril lo va, kan thu leh kan thiltihin a hrilh ber zawk a ni” a tih kha a dik ngawt mai.
Hun hi chu ngai reng mah se, hun hmangtu a mihring a te kan ral hma thin avangin hun hi a lo rei lo va, a tawi thin niin a lang. Jacoba paw’n “In nuna chu eng nge ni? Chhum rei lote lo lang a, ral leh ta mai thin ang hi in ni si a” (Jacoba 4:14) tia a lo sawi reng kha. C Durthanga paw’n ,
“Lenrualte u, in dawn ve thin em,
Hun hian hringnun a nghak ngai si lo;
Par ang kan chuai vanglai ni a liam,
Kan chuai hun tur lah kan dawn ngai lo” tiin ‘Vanglai ni a liam’ tih hlaah a sawi.
Hun rei lote pawh hi a hlu hle a ni ang. April ni 14 kum 1912-a Titanic lawng liam tak mai pil chhan kha minute thuma Officer tlai vang niin an sawi. Michael Learns to Rock hlaah pawh “25 minutes too late” tih kha hmuh kha. Second 60-in minute khat a siam a, minute 60-in darkar khat a siam leh a, darkar 24-in ni khat. Ni khat hlutna hre turin second, minute leh darkar hlutna kan hriat a ngai.
Hun hlut zia ka ngaihtuah a piangin Pink Floyd hla ‘Time’ tih kha ka hre chhuak thin.
“Ticking away the moment that make up a dull day
You fritter and waste the hours in an offhand way
Kicking around on a piece of ground in your home town
Waiting for someone or something to show you the way”
I hun neihte chu a hlut zia hre thiam pha lovin, thil ho mai mai tih nan i khawh ral mai mai thin a. I kal zelna tur kawng kawh hmuh tur che leh thurawn petu tur che i nghak lehnghal a.
“Tired of lying in the sunshine
Staying home to watch the rain
And you are young and life is long
And there is time to kill today
And then one day you find
Ten years have goy behind you
No one told you when to run
You missed the starting gun”
Hringnun chena nun hlim tak hmang turin hun nei tam tawkah inngaiin, i taksa te chu a la chak that em avanga rei tak dam turin i inngai a. Mahse, ni khat chu i inngaihtuah vang vang hnuah kum sawmin i lo tlai reng tawh tih i hmuh chhuak a. Tichuan, i hmalama tlan turin i inbuatsaih ta a, mahse, tlan tura hrilhtu che i neih loh avangin silai a puah veleh tlan nachang i la hre lo zui lehnghal a!
“And you run, and you run to catch up with the sun
But it’s sinking
Racing around to come up behind you again
The sun is the same in a relative way
But you’re older
Shorter of breath and one day closer to death”
Theih tawp chhuaha hmalam pan turin ni en laiin i han bei ve vak tak nang a, khua lah a thim hmain a thim chho zung zungin mai si a. Ni chu ngai reng mah se, i lo upa ve ta. I hah hma ta hle a, thihna kawng i hnai chho chu a ni ta reng mai!
“Every year is getting shorter
Never seem to find the time
Plans that either come to naught
Or half a page of scribbled lines
Hanging on in quiet desperation is the english way
The time is gone
The song is over
Thought l’d something more to say”
Ni leh thla leh kumte chu an ral zung zungin i hria a, i thil lo ruahhman leh tih i tumte chu titha hman lovin, engmah lovah an chang zo va. I tih hlawhtlin awm chhun te lah chu lehkha phek tlemte daih, tlan paha chhe taka ziak ang chauh a ni lehnghal a. Tichuan, ngawi reng leh beidawng taka hun liam tawh hnu leh hmalam hun thlir chu i tihthei awm chhun a ni deuh chauh tawh. Hunin a liam san che a, rimawi mawina pawh a chuai zo ta.
Roger Water (Pink Floyd Band member)-in a phuah ‘Time’ hian hun kal chak zia a tarlang a. Hun liam chak zia hi keini mihringte hian kan hre lo fo lehnghal a. Hun tha kan neih kan khawhral mai mai avanga kan inchhir viau tawh hnuah hi chuan kan lo tlai duai tawh thin a ni.