Kum 2023 MLA General Election Campaign laia ZPM Party-in mipui hnena kan lo aupui thin BANA KAIH (HANDHOLDING POLICY) Sorkar Flagship Programme lo ni ta chu nimin khan Vanapa Hall ah tlangzarhna hun hman a ni a. He hunah hian Mizoram Chief Minister Lalduhoma chu khuallian niin Bana kaih (Hand Holding Scheme) tlangzarhna hun a hmang a, kuthnathawkte khaichhuahna tur Scheme tlangzarh a ni ta chu lawmawm a tih thu a sawi.
Duha chuan, “Kum tam tak kuthnathawktute dinchhuahna tur policy hi Zoram mipuite hnenah kan lo zuar tawh thin a, mipuite thinlung hneh viau thin mahse party thenkhatin mipuite retheihna remchangah la a, SEM POLICY an tawktarh leh thin avangin he policy hi hun rei tak haider a lo ni tawh thin. Nimahsela, beidawng lova kan policy-a kan rinawm tlat avangin vawiinah chuan Pathian leh mipuite zarah BANA KAIH POLICY kan lo tlangzarh thei ta a, kuthnathawktute thlai thar lei leh kan thalai eizawnna kawnga mahni kea din tumte tan nghenchhan theiha kan lo awm dawn ta hi lawmawm ka ti a, chutih rualin he policy hlawhtlin hun tur nghakhlel ve em em kan lungrualpui mual min liam san ta te rilru ah an awm reng a ni,” a ti.
Chief Minister chuan, “Thlai thar lei hi Society kaltlanga kalpui tur a ni a, khawtinah Society pakhat zel din tur niin society member ni tur hian Political Party ang zawnga kalpui a rem dawn lo a, Mizoram khua leh tui dik takte chu he society ah hian tel theih vek a ni. Society member tharchhuah lo chu Sorkar hian thlai thar lei a buaipui dawn lova, amaherawh chu Society-in thlai thar hralhna kawnga dawr duh bik company emaw an nei a nih chuan zalenna kan pe dawn a ni. Chutih rualin Sorkar chuan empanelled Buyer te society tan a ruatsak dawn a, anni hnenah hian mahni inngaihtuah thei lo te tan thlaithar a hralh theih dawn a ni. Mizoram hi sumdawnna huangah kan lut ve tak tak tawh dawn a, chuvangin kan rinawm angaia, Sorkar lakah leh hnamdang kan sumdawnpuite hnenah kristian nunzemawi leh Zonun zemawi rinawmna kan lantir a tul dawn hle a ni. Nakinah phei chuan QR Code te siam turin hma kan la chho zel dawna mi rinawmlote chuan sumdawnna kawngah harsatna an tawk dawn a ni,” a ti.
CM chuan, “Bank Loan chungchangah Sorkar chu Quarantor ah kan tang dawna, nuai 50 thleng ah kan thalai Entrepreneurship lama tuite tan kan din sak dawn a ni. Sorkar hmasa ten dan harsa leh khirh tak tak lo siam tawh mah se, Sorkar thar chuan heng dante hi siam that tumin hma kan la zel dawna, kan thalaite an dinchhuahna tur hi kan ngaihtuah pui zel dawn a ni. Chutih rualin mi rinawmlo loan rul tha duh lote chu Sorarin loan interest an rulhna a pe let dawn lo. Handholding Scheme hi Sorkar Flagship Programme pawimawh tak a ni a, chuvangin Sorkar Officialte pawhin ngaipawimawh hle turin ka chah a, kan ram dinhmun khaichhuahna tur programme a nih avangin Pathian rawngbawlna pawimawh tak ani tih hriaa, Department tina thawktuten mipuite tan theih tawp chhuah theuh turin ka ngen a ni. Kan MLA leh Minister-te pawh an thawkrim hle a, he handholding Scheme hnuaiah hian an bial theuha mipuiten an hlawhtlinpui dan kan la thlirho leh dawn a, innelna thianghlim kan nei dawn a ni,” a ti bawk.
He hunah hian PC. Vanlalruata Agriculture Minister & Mizoram Agriculture Marketing Board Chairman ni bawk pawhin thu sawiin, “Party hrang hrang ten Mizoram damna turin mipuite hnenah damdawi kan chawh thin a, Sorkar hmasate pawhin NLUP,SEDP etc. hmangin mipuite khaichhuahna tur damdawi an lo chawh tawh thin a ni. Amaherawh chu heng Policy-te hi a thlawna sum dawnna tur niin mipuiin an ngai thin a, hei hi a pawi hle a ni. ZPM Sorkar ah erawh chuan SEM POLICY kan tawktarh lo a, rim taka thlan tui fara thawktute tan Sorkar hi nghenchhan tlaka din kan tum a ni. Sorkar thar hian Marketing angaipawimawh hle a, Marketing Board te dinin theih tawpin hma kan la mek a ni. Kan ramah hian hmasawnna tluantling a awm theih nan hma kan la zel dawna, tun hnaiah khan Prime Minister Narendra Modi pawhin PM – AASHA Scheme a tlangzarha, hengte pawh hi kan handholding policy nen a inmil chho zela, Central Sorkar nen pawh Bana Kaih Policy ah hian lungrual takin ke kan penho thei dawn niin a lang. Tunah hian Bana Kaih (Handholding Scheme) hnuaiah hian chhungkaw 44585 an in ziaklut tawh a, an la rawn inziahluh belh zel turha kan ngai a ni. Tin, Mizoram sorkar chu Buhhum lei turin a inbuatsaih meka kg ah Rs.30 a lei tum a ni a, mamit leh kolasib ah bul tanin, zau zawka hma lak zel kan tum a, heng buhhumte hi a herna khawlah herin retailer buhfai sem atana hman tum a ni a, buh chi tui zawk sem chhuakin, mizo mipuiten buhfai tui leh hrisel kan ram chhunga thar chhuah ngei kan ei theih nan handholding Policy hnuaiah hian hma lak mek a ni,” a ti.
Lalmalsawma Pachuau, Member Secretary, MSPCC & Secretary to the Government of Mizoram hnen atangin “BANA KAIH SCHEME” sawi hawnna ngaithlak a ni bawk.