Consumer thu nawi pawimawh + Bill sang uchuâk thu

• Lallunghnema, Charity Lodge

• Bul tanna:

Heti tak maia Consumer thil ka buaipui ta mai hi mak ka tiin kei mah leh keimah ka inzawt thin a. Sumpaiah hlawkna a awm si lo, tiin ka âng fiam fo. A hnu lawkah ka inngaihtuah chhuak thin a, sum ringawt hi hausakna a lo ni love,ka rilru a hausa thung alawm, tiin ka inthlamuan a. Consumer right ka buaipui thei hi ka va lawm em! ka ti thei ta zel a ni.
Consumer thu nawi pawimawh:

• I thil lei leh service dawnah lungawilohna i nei a nih chuan ngawi mai lo la.
• I dikna leh chanvo humhim nan huaisen takin lo pen chhuak rawh le.
• Lungawi lohna i nei a nih chuan District tinah Consumer Court a awm a, chutah chuan ziakin complaint hi theh luh mai tur a ni.
• CFCE chuan kan lo pui thei che. Hlauh tur a awm lo.
• Consumer WhatsApp Group hmangin kan pui thei bawk che.
• Online-in edaakhil.nic.in ah engtik lai pawhin a complaint theih bawk.

Consumer-te Dikna leh Chanvo

1. Duh Thlan Theihna (Right to Choose)
2. Kan Himna Kan Dikna Chanvo (Right to Safety)
3. Zangnadawmna Phut Theihna (Right to Seek Redressal)
4. Hriattirna Dawn kan dikna (Right to be informed)
5. Kan Lungawilohna Min Ngaihthlâksak tur Ani ( Right to be Heard)
6. Hrilhhriatna Dawn Kan Dikna (Right to Consumer Awareness)
   Consumer-te Mawhphurhna

Consumer-ten kan dikna leh chanvo neih hrang hrangte hriat chian.
Kan thil lei leh service hmante a nihna chiang taka hriat.

• Cash Memo/ Receipt dil thin.
• ISI/AGMARK/FSSAI, etc chuanna ngei lei leh hman hi a him…
• Maximum Retail Price(MRP) ai sanga thil hralh leh tihdanglam hi danin a khap tlat a ni.
• Passenger phur lirthei chi hrang hrangte pawh Sorkar rate ai sanga tlan hi dan in a khap tlat a ni.
• Gas semtuten gas an semin an buk ngei ngei tur a ni a, a leak leh leak loh te an check thin tur a ni.

Tui Bill sâng uchuâk tak chu:

Kan Centre, Consumer Centre siam CONSUMER Group-ah hian thupui pawimawh tak tak kan sawiho thin a. Chung zinga mi, Member pakhat thu post chu ka’n chhawp chhuak ang e.

“Hei vawiinah tui bill ka dawng a, kan bill chu Rs 129599/- chauh a ni”, He thil hian memberte mak tih a hlawh hle a. He Gr.member a tel ve, PHE thuneitu sangte beng a thleng thuai a. Action lak zui nghal a ni tih kan lo hria a. Kan lawm hle a ni. Group zar kan zo tan hle. He Groupah hian 1000 chuang kan awm tawh a, a limit tawh a ni. Group dang siam a ngai mai thei e. Mi zawng zawng consumer kan ni si a.