Pathianni zan khan English Premier League-ah inkhel ngaihven hlawh tak a awm a, champion lai Manchester City leh Arsenal te Etihad Stadium-ah an inkhel. Inkhel hmuhnawm takah Manchester City in an mualah tlawm an pumpelh hram a, point khat hlu tak an hmu. Pathianni zana inkhel dangah Brighton leh an mikhual Nottingham Forrest te chu 2-2 in an inhnehtawk ve bawk.
- Haaland leh bawk
Manchester City leh Arsenal te hi season hnih chhunga EPL a pakhatna leh pahnihna lo ni tawh an ni a, season kal mekah pawh champion tura rinkai fal pahnih an ni. Arsenal manager Mikel Arteta hi Manchester City manager Pep Guardiola Assistant manager lo ni tawh a ni a, manager pahnihte hi an inhrechiang dun hle. Team lian pahnih, hnehna chang zawk zawk hmahruaitu thar ni tur an nih vangin an inkhel hian ngaihven a hlawh hle. Ngaihven a hlawh ang ngeiin inkhel hmuhnawm tak a ni a. Tlem zawk ni chunga hun tam zawk hmachhawn Arsenal an chak teuh hle. An khingpuite nawr bet tlattu City hian hun pek belh tawp dawnah tlawm an pumpelh hlauh thung.
Manchester City hian an mualah bul an tan tha viau a, goal an thun thuai. Inkhel tan atanga minute 9-na lekah fing zetin Arsenal tlarhnung an thiat. Goal thun thulh hlei thei lo Erling Braut Haaland chu EPL-a defender inkawp fuh ber ni mek Wiliam Saliba leh Gabriel te inkarah a dawk nawlh a, awlsam taka pet goal in hmahruaina goal a thun. City hmahruaina goal thuntu chu Haaland leh bawk a ni. Haaland hian season tharah khelh 5 atangin goal 10 a thun tling der tawh. Haaland hian City tan vawi 105 khelin goal 100 a thun tling chiah a. Tualchhung league-ah club pakhat tal goal 100 thun tlin ran lamah Cristiano Ronaldo record a tluk a, mel lung thar pawimawh tak a phun thar bawk.
Hma takah goal an thun ve ve vangin inkhel a hmuhnawm chhunzawm a, ball kangah Arsenal an hlauhawm thei hle. Uiawm taka a tauh luh loh hnuin Gabriel Magalhães an vannei ta nge nge. Defender ball tauh thiam tak Gabriel hian Saka corner pet chu fuh zetin a tauh goal a, hma an hruai letna goal a thun. Ball kanga hlauhawm tak Arsenal player dang ten Gabriel-a’n a tauh goal theih nana City si nghak Ederson an chhaih buai a, che thei lek lovin an siam. Player pahnihin Ederson an dan chep laiin Gabriel hian awlsam takin a tauh goal kha a ni a. Goal an thun theih nan Arsenal hian ruahmanna fing tak an nei lawk tih a hriat hle.
Hmahruaina goal an thun vangin phur viau mah se Arsenal an phur rei lo. Hun pek belh tawp dawn tepah Leandro Trossard chuan a vawi hnih nan yellow card a hmu a, red card hmuin minute 45+8-ah hnawhchhuah a ni. Trossard hnawhchhuah danin titi siam zui mah se Belgium forward hian hnawhchhuah theih turin dan bawhchhiat a nei ngei a, first referee Michael Oliver kha dem chiamna tur a awmin a hriat loh.
Chawlhlawh hnu lamah tam zawk ni chunga inlan City in inkhe an thunun hmiah a, mual chanveah an khingpuite an dang bet tluan a ni ber tawh. Tlem zawk ni chunga inlan Arsenal hian an hmahruaina humhim hram tumin tan an khawh a, an zavaiin goal venhim hna an thawk a ni deuh ber tawh. City hian goal thun theihna hun tha nei zauh thin mah se si nghak che tha tak David Raya an paltlang thei reng a, an mualah an tlawm teuh hle. Hun pangngaiah City hian an si phurh an sut thei lova, hun pek belhah pawh an si phurh an sut lawk thei lo. Hun pek belh tawp dawn retah City an vannei a, bench atanga lut John Stones chuan minute 90+7-ah goal thunin an si phurh a sut ta nge nge.
Stones hnuain boruak a lum zui viau a, boruak lum tak hnuaiah goal lut a awm belh tawh lo. Inkhel hmuhnawm takah chak zawk an awm lova, team lian pahnih Manchester City leh Arsenal te chu 2-2 in an intha then ta a ni.
Arsenal lakah tlawm an pumpelh hram vangin Manchester City chuan Liverpool a lehpel a, hma hmahruaina an hloh tawh chu point khata sang zawkin an nei let leh. City ang thova season thara tlawm la nei lo Arsenal hian khelh 5 atanga point 11 hmuin palina an luah thung. Arsenal hian Mimualah khingpui hautak an nei zawn a, Tottenham leh City hmachhawn zawn mah se tlawm an nei lo zui zel a, hei hian champion thei an nihzia a tilang chiang hle a ngaih a ni.
- Brighton an chak zo lo
Pathianni zana inkhel dangah season thara khel tha Brighton & Hove Albion chuan an mikhual Nottingham Forrest an hneh zo lova, an mikhual te nen hian 2-2 in an inhnehtawk.
An khelh hnuhnung bera Liverpool hnehtu Nottingham Forrest hian Brighton lakah bul an tan tha viau a, goal an thun thuai. Nottingham Forrest tan hian Chris Wood chuan minute 13-naah penalty atangin hmahruaina goal a thun. Hma taka an si phurh hi Brighton tan Jack Hinshelwood chuan minute 42-naah a sut a. Minute 45-naah Danny Welbeck chuan hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, Ramón Sosa chuan minute 70-naah Nottingham Forrest si phurh a sut. Morgan Gibbs-White chu minute 83-naah hnawhchhuah a ni a. Tam zawk an nihna chhawr tangkai tum viau mah se Brighton in an chhawr tangkai zo lova, an mikhual lakah an chak zo ta bik lo a ni. An mualah chak zo lo mah se Brighton hi season thara an khel tha tluang a, tlawm ngei lovin khelh nga chhung an kal tluang ta chiah a. City leh Arsenal te nen tlawm nei lo awmchhun an ni.