Nimin khan ZPM party chhung inkhawmah PC. Vanlalruata Minister chuan, “Mizoram damna turin damdawi kan zuar a, mipuiin kan damdawi zawrhte chu tha tiin Sorkarna min pe a, tun atanga kum 10-ah chuan Mizoram hmel hi a danglam tawh hle ang,” tiin, “Bana Kaih Policy-ah hian thlai thar hralhna tur kan ngaipawimawh ber a, thlai thar Wholesale a zawrhna tur Building sak nan hmun hnih kan nei tawh a ni,” a ti.
PC Vanlalruata chuan, “Kan kuthnathawktute hian Link Road an mamawh thu an sawi thina, tih hlawhtlin sak ngei pawh kan tum a, ZPM Sorkarah hian kum 10 chhungin chhungkaw tam tak an ding chhuak ngei in ka ring. Kum 10 hnuah chuan Mizoram hian hmel thar a hmuh ngei ka beisei a ni. Hand holding Policy hi Mizoram tan damna tur anih ngei ka beisei a, kan Hand Holding Policy hi thla 9 chhungin kan tlangzarh hman a, kan Chief Minister leh kan Officer-te thawhrimna leh taimakna fakawm ka ti em em a ni. Hand Holding Policy hian a tum ber chu hmasawnna tluantling leh nghet a ni a, kan ngaih pawimawh ber pakhat chu thlai thar hralhna Market a ni. Sawrkar kal tawhten helam hi an ngaihthah em em a, keini chuan kan auhla berah kan hmanga tihlawhtling turin atakin hma kan la mek a ni. Kuthnathawktuten thil man (rate) hre sain thlai an ching tawh dawn a, kan inzawrh dan ang ngeiin tunah pawh kan kal tan mek a ni. Kan sawrkar tirh khan ka sawi tawh a, Aizawl khawpui chhung hmun 4-ah thlai thar hralhna tur Wholesale Market kan sa ang ka ti a, hei hi chak takin kan bawhzui nghal a, tunah hian hmun 2-ah wholesale market sakna tur sum cheng veibelchhe 10 kan dawng der tawh a ni. A hmunhma tur pawh Sihphir leh Melthumahte kan en tawh nghe nghe a ni,” a ti.
Agriculture Minister Ruata chuan, “Bana Kaih Policy-ah kan hriat angina cheng nuai 50 thleng Bank Loan dahkham ngai lovin a lak theih dawn a, chumai bakah Chief Minister Package cheng nuai 1 a lak theih dawn bawk. Bana Kaih Policy-ah hian hlawhtling ngei turte chauh Sorkarin a ngai pawimawh dawn a, a thlawna sem ang kha a ni ve lo tih kan hriat a tha. Kum khat pawh kan la Sorkar hmain Opposition Party ten min beihna tur ringawt zawngin min bei nasa hle a, mahse keini chuan theihtawp chhuahin kan ram tan hna kan thawk zel dawn a ni,” a ti bawk.
Nimina chhung inkhawm hi K. Lalthangthuama, General Secretary-in a kaihruai a, Vanlalhruaia Adviser chuan hunserh hmangin Lalliansawta President chuan mi thar a lawmlut a, lawm luhte atangin thu sawi ngaihthlak a ni bawk.