Congress Thalai chuan nimin khan thuchhuah siamin, December ni 8,2023 (Zirtawpni)-a Mizoram Chief Minister atana lakluh Pu Lalduhoma chuan chanchinbumite kawmin ZPM sorkarin ni 100 chhunga an tih tur point 12 phur takin a puang a, thlai thar leina tur Vbch 110 dah a nih thu phur takin a puang, an ti a.
December ni 14,2023-a 9th Mizoram State Legislative Assembly Council of Ministers thutkhawm hmasa ber, Assembly Recess Room ah Chief Minister Pu Lalduhoma kaihhruaia neiha an thu ngaihtuah an pawm zingah, Sorkarin ni 100 chhunga tihtur (100 days programme) duan a nih thu leh a thawktu department te hnathawh dan viltu tur Monitoring Committee siam a ni a, GAD chu Nodal Department a nih thu tarlan a ni, tiin.
Ni 27th February 2024 (Thawhlehni)-a 9th Mizoram Legislative Assembly Budget 2024-2025 pharhnaah Chief Minister leh Finance Minister ni bawk Pu Lalduhoma chuan, kum 2024-25 chhunga Annual Financial Statement a pharh khan, Sorkar lakluh a nih veleh ni 100 chhunga hmasawnna atana tihhlawhtlin tur, “Chief Minister’s 100 Days Programme” puan a nih thu a sawi leh a. Hemi bawhzui tur hian Commissioner & Secretary to Chief Minister kaihhruai monitoring committee chu din nghal a nih thu leh programme hnuaia project-te chu March 31, 2024 chhunga tihhlawhtlin tum a nih thu a sawi leh bawk, an ti.
August ni 15, 2024 (Ningani) khan Independence Day lawmna Sipai Lammualah, kum 2023 December ni 8-a sorkar thar kan din tirh khan Chief Minister’s 100 Days Programme kan puang a, chumi hnuaiah chuan hmachhawp hrang hrangte kan siam a nih kha. Khangte kha tunah chuan ṭha takin kan tihlawhtling tawh a. He mi hnuaiah hian thlai thlan bik te hlawk zawka hralh a nih theih nana hma la tur Agricultural Market Assurance Fund Management Board (AMAFMB) din chu hmalakna pawimawh tak pakhat a ni. Revised Estimate 2023- 2024 angin Agricultural Market Assurance Fund atan hian Cheng Vaibelchhe 110 dah fel tawh a ni, tih a sawi nawn leh bawk, tiin.
Pu Lalduhoma hian Ni 100 chhunga tihtur a sawi programme hnuaia project-te chu March 31, 2024 chhunga tihhlawhtlin tum thu ni 27th February 2024 (Thawhlehni)-a a sawi chu August ni 15, 2024 (Ningani) khan Independence Day lawmnaah tihhlawhtlin a nih thu a sawi a. Hei hi mipui bumna a ni, an ti a.
He pawisa cheng Vaibelchhe 110 hian Agriculture Market Assurance Fund (thlai thar support price atana dah) atangin thlai thar engmah lei a ni loa, Agriculture Market Assurance Fund Management Board leh Agriculture Market Assurance Management Committee meeting senso atan cheng nuai hnih sangkua zahnih (Rs. 2,09,200), Market Study senso cheng singli sangriat, zanga leh sawmriat pathum (Rs. 48,583/-) leh Stationary senso atan cheng sanghnih zaruk (Rs. 2,600 hman a ni daih thung, an ti bawk.
An thuchhuahah chuan, engkim Research base fel vek tawha sorkarna siam a, ram kaihruai tura in sawi khan engmah an lo in peih loh zia chiang takin tarlang a. Thlai thar pawh lei si loa meeting senso a mipui pawisa heti zat an ei liam mai mai hian nuam tawl sorkar kan hrawn hi a vanduai thlak a. Chief Ministerin Ni 100 chhunga tihtur kan ti hlawhtling a tih pawh dawt a nih zia a tarlang a. Mahni lan ropui tumna avanga dawt sawi leh Award dawng anga in sawi chiam chiam hi a rang lama sim turin Congress thalai chuan ZPM sorkar a ngen a ni, an ti.