Paliang huangah vawi hnih ngawt lo champion tawh Anthony Joshua sawp a, IBF heavyweight champion thar Daniel Dubois a promoter Frank Warren chuan Oleksandr Usyk hmachhawn nawn leh an duh thu a sawi.
Chhuak hmasa lama kan tarlan tawh angin Daniel Dubois hian Pathianni zing khan a hmuna boxing entu tam ber record siam khawpa mipui pungkhawm tam hmaah Anthony Joshua a sawp. Joshua nen IBF Belt an inchuh tum hian round nga chhungin vawi nga ngawt a khingpui hi a hnek tlu hman a, a chak chiang hle. Ti khawpa palian huanga boxer tha ber zinga mi Joshua a sawp thei hian Dubois namai lohzia a lantir chiang hle. Joshua a hneh hnuin tunge a hmachhawn leh dawn tih a la chiang rih lova, Joshua nen rematch nei thei tura inremna an neih pawh tihnun a ni dawn em tih a la chiang lo bawk.
Dubois hmachhawn leh tur an inrinsiak lai mekin a promoter Frank Warren chuan WBO, WBA leh WBC champion Oleksandr Usyk hmachhawn nawn leh an duh thu a sawi. Ukranian boxer Usyk leh Dubois te hi August 2023 khan an lo inhmachhawn tawh a, round 9-naah Usyk hian knock out in hnehna a chang. Usyk a hmachhawn nawn leh thei a nih chuan Usyk hian hnehna chan let ngei tumin tan a khawh ang.
Palian huangah kawnghren pali kawl khawm thei hmasa ber Usyk hian a hneh tawh Tyson Fury a hmachhawn nawn leh dawn a, Fury a hneh nawn leh a nih chuan Dubois hmachhawn nawn leh theihna hun tha a nei ang a. Fury lakah a lo tlawm ta a nih pawhin Dubois nen hian IBF kawnghren inchuh theihna hun remchang an nei thei tho tura ngaih a ni.