- Dr. C. Lalrampana
A KAMKÊUNA
Khawvel pumah Indigenous mi maktaduai 476 vel an awm a, hnam hrang hrang 5,000 chuang zinga mi an ni. Heng hnamte hi Antarctica tih lohah chuan mihring awmna climate zone leh khawmualpui (Continent) hrang hrangah an awm darh vek a ni. India ramah hian Scheduled Tribe-ah hnam 705 pawm an ni a. Central India-ah chuan Scheduled Tribes-te hi “Adivasis” tia sawi an ni tlangpui a, a awmzia tak chu ‘Indigenous Peoples’ tihna a ni. Mipui maktaduai 104 vel nia chhut niin, mipui zawng zawng zinga 8.6 % an ni. Mizote hi heng hnam chekhnawk (tribal) zinga mi hi kan nih avangin sorkar hnaah leh development hrang hranga hamthatna tinrengah vohbik chanvo (tribal quota) neiin kan awm a, hei hi a nawmna lai tak. leh kan vanneihna tak pawh a ni. Khawvel pumah ram leh hnam (nation or country) hi 193 zet a awm a; chu chu United Nation Organization (UNO)-ah an inthlungkhawm vek a ni. Khawvela ram upat dan indawt 11-te chu tute nge thlir hmasa teh ang: 1. Iran: 3200 BCE; 2. Egypt: 3100 BCE 3. Vietnam: 2879 BCE 4. Armenia: 2492 BCE 5. North Korea: 2333 BCE 6. China: 2070 BCE 7. India: 2000 BCE 8. Georgia: 1300 BCE 9. Israel: 1300 BCE 10. Sudan: 1070 BCE 11. Afghanistan: 678 BCE. India hi khawvela ram upate zinga 7-na kan ni. Bhills-ho hi India rama hnam upa ber pawla ngaih an ni. Thawk khat lai khan Rajasthan, Gujarat, Malwa, Madhya Pradesh leh Bihar state-ahte roreltu an lo ni tawh a ni. Munda hnam ropui tak takte hi cross section an ni a, India rama ramsa hnam anga ngaih an ni a; hmel tha han tih tur an vang hle.
TUNGE HMELCHHIA:
Hmelchhia kan tih hi kan ngaihdanah a innghat thui hle awm e. Taksa hmel leh vun emaw, mizia emaw sawina emaw tarlanna pawimawh tak a ni thei. He khawvelah hian mi hmeltha tak tak an awm a, mize tha lo leh nungchang mawi lo ber ber nei pawh an awm bawk. Tin, taksa, vun nalh lo leh hmeltha lo tak tak, rilru tha ber ber nei si an awm bawk. Eng chu nge hmeltha chu ni ta ang le? Kan Mizo upate chuan hmeltha aiin nungchang tha a pawimawh zawk an ti chamchi thin. Khawvela hmelchhe ber chu Joseph Merrick a ni a. A lar dan zawk chu Sai mihring (The Elephant Man) tia hriat a ni. Natnain a tihbuai êm avangin miten an en tha ngam lova, hmuh nuam an ti thei ngai lo, a chhan chu han en mai pawh hian a hmel a chhiat lutuk (grotesque) êm vang a ni. Mahse, mi hriat theih chinah chuan mi fel ngilnei ber a ni tih hriat a ni tlat si. Rilru fing tak a ni bawk. A dawt leha hmelchhia chu Mary Ann Bevan niin Dec. 20, 1874 khan lo piangin Dec. 26, 1933 khan kum 59 mi niin a boral a ni. Amah hi English nurse a ni a, acromegaly a vei hnuah circus sideshow circuit-ah “khawvela hmeichhe tenawm ber” tih ni chungin a zin chhuak a. Mary Ann Webster hi East London khawpui Plaistow-a hnathawk chhungkua niin unau 8 zinga pakhat a ni. A hnuah nurse hna a thawk a ni. Kum 1902 khan Thomas Bevan nen an innei a, fa pali an nei. A pasal Thomas Bevan chu kum 1914 khan a thi a. Sideshow hmanga hnathawk a ni. Bevan hian pasal a neih hnu lawkah acromegaly symptoms hi a vei tan a, kum 32 vel a vei a ni. A than dan pangngai lo leh hmai danglamna a nei tan a, chubakah lu na nasa tak neiin a khaw hmuh a tlahniam bawk. Kum 1914-a a pasal thih hnu chuan amah leh a fate pali enkawlna tur sum a nei tawh lo. Bevan hian a hmel lan dan chu capitalize a tum a, hmeichhe hmelchhe ber intihsiak “Ugliest Woman” contest-ah a tel a, chutah chuan pakhatna a ni ta a ni. Kum 1920 khan American showman Samuel W. Gumper chuan a thla a la a. Kum 2000 chho tir lam khan United Kingdom-a birthday card-ah Hallmark Card-te chuan Bevan lem hi an hmang a. Card-ah hian television-a dating show Blind Date chungchang a sawi a. Chumi hnu chuan Dutch doctor pakhat chuan natna avanga hmeichhe piangsual tawh zah lohna a nih thu complaint a siam a. Hallmark chuan a rem lo tih a pawm a, a card sem chu a titawp ta a ni.
HNAM HMELCHHIA
Khawvel huapa hnam hrang hrang hmel chhiat dan indawt 15-te chu English; Serbian; Albanian; British; Serbian; balt; Belgian; Belarusians; Irish; Scots; Swiss; Grik; German; Finns; Ukrainians; Romanian-te an ni. England hi Island a nihna nen hian a inzawm avang leh thlan chhuak tlem an nih avangin Europe hmar lam, Scandinavian emaw Balkan hmeichhiate nena khaikhin chuan an hmeltha lo hle. UK-ah chuan mawng lem; mit hmul lem; tin lem; sam lem; hnute lem etc. hmansualna a tam hle. British hmeichhiate hi an hmel lan danah an innghat nasa hle a, a chhan chu an pianphungah an hmuhnawm lovin mi an hip lova, chemical leh thil lem (fake stuff)-ah an innghat a, langsar zawka lan chhuah an tumna hian an hlutna leh an nihna a tihniam a ni. Ram chhung hmun tinah “beauty “ salon hmuh tur a awm a. Chaw, zu, khaw lum, nunphung inthlak danglamna hian an taksa pianphungah a chhe zawngin nghawng a nei a ni. A ram leh hnam ang chuan khawvela hmelchhe hnam zingah India kan lang ve lo hi a lawmawm hle. Sap kan ngaihsan em em, an ek pawh uih ve lo hial tura kan ngaihte hi hmelchhe ber pawlah an awm mek a nih hmel. An lianin an hleitling a, an ngo vur ringawt a; an hmulphurh erawh a chhe ve hle. Chuvangin, zohnahthlak lanute u, sap vunngo pasal tur ringawt hi melh chi a ni love.
HNAM HMELTHA
Mawina hi mahni rilru atanga chhuak (subjective) tak a ni. Brazil hi genetic-ah a hausa hle a, a bik takin hmun thenkhatah chuan Portuguese, Amerindian, leh Black genes-te chu Italian, German, Japanese, Spanish, Lebanese, Russian, Polish, etc.te hi Brazil nen an inthlah pawlh vek a, United states ang bawkin kum zabi 19-na chanve leh kum zabi 20-na tir lam khan pem lut tam tak an awm a, mahse, US ang lo takin Brazilian taksa pianzia pangngai an awm meuh loh laiin, mawina lam an ngaih pawimawh vek avangin an hnam pum hian hmeltha nhna an neih phah a; hei hi plastic surgeon-te chuan documentary atangin an nemnghet a ni. He rilru (ideal) hian hnam hrang hrang inchawhpawlh (mix-and-match composite) a keng tel a: African curves, European vunvar leh hnar ngul sang leh mawi, natural, tropical leh a dang tam takte avangin khawvela hnam hmeltha nih an hlawh a ni. India hi khawvela hnam hmeltha thlan chhuah zingah palinaah kan awm pha vea a tihzia hle mai.
MIZO HNAM VE HI
Mizote hi tribal ni mah ila hnam hmel tha kairual pawl tak kan ni. Mahse, kan pumrua a lian lem lo hle. Huaisenna lamah huaisen tak niin kan inngai a, mahse, a mal khai chuan kan dawizep lawi si emaw ni? Kan fingin thil kan thiam hmaa, mahse, ze nghet kan nei lova, a engamah hi thiam nal tak tak kan nei lo ni berin a lang. India ram state 29 leh UT 7 zingah Jammu & Kashmir khu hnam hmeltha berte an ni a, seven sisters North East States zingah Sikkim hi an hmel tha ber bawk a, a bak hi chu kan inang pet pet khawp mai. Hetih lai hian Mizote hi hnam hmeltha kairual ber pawl kan ni tih chu state pawn lam mite pawhin an hmuh dan a ni.
A TLÃNGKAWMNA
Hnam hneltha leh tha lo chungchang kan tarlan takte khi ngun taka thlirin India ram (Bharat) hi hmeltha ram then zingah 4-na kan ni pha a, tribal-ho zingah pawh Mizote hi hmeltha kairual tak, hmelchhe fawr bik awm tlemna pawl tak kan ni. Mahse, hei hi achhan hrang hrang a awm thei a, chungte chu: Mahni neih bak leh nihna baka inchei kan uar vang; mahni nihna dik tak lanchhuahtir ngam lova incheina (makeup-cosmetic) leh thil lem (fake stuffs)-ah kan innghah nasat vang; kawng tinrengah a dera nun kan thiam vang; Zia kan thup thiam vang; takna nun kan neih loh vang; mahni hnamzia phochhuah aia hnam changkang zawkte hnamzia kan ngaihsan vang; Sadukai leh Pharisai nun la chhawnga lan mawi ringawt kan tum vang; dâwt kan ngainat vang; lârna leh hmingthan mawina ringawt kan ngaihtuah vang. Ekhai! Sawi tur a va han tam tehlul êm! Nula pakhat pawh makeup tel lovin a hmel pangngai hmuh tur a vang lutuk a, tuk khat chu a zing tho hmai phih zo hlim a pain a hmu a; “Ekhai! mami, kan va inhmu khat ve” a ti hial e an tih chu! England-ho ang mai khuan mahni hmel dik leh pianphung dik tak lanchhuahtir ngam lovin makeup chihrang hrang leh thil lem (fake stuff) kan uar êm êm a; hnatlan nikhuate leh thlan laih nikhuate hian hnathawh thawmhnaw dik tak hak aiin pisa kai tur ang maia inthuamin kan chhuak khawm thin a; BPL fanu/fapa ni se, Officer leh mihausa fanu/fapate aiin an nalh zawk a, mi inhnuai chep tak kara cheng leh mi in luah hawhtute lah a in neitute ai aiin an nalh bawk nen, kan lan danah chuan hnam hmel tha tak angin kan lang thin a ni mahna? Mahse, kan nihna tak tak lan chhuahtir ngam ngat ila chuan hmelchhe fe fe, rethei bakberh ve tak tak hi chu kan tam ngawtin a rinawm. Hetiang hnam kan nih avang hian kan NGO hrang hrang, kan political Party hrang hrangte leh kohhran hrang hrangte pawh hian an din chhan leh thil tum (main aims & specific aims) emaw, an objectives aiin a mawia lan that leh hmingthan mawina lamah ke penin Zoram mipuite min chaihkual vel ta thin ni berin a lang. Aw! Zoram, tho la, i chakna inbelin i thuam dik tak leh i mize dik tak kha lanchhuahtirin huaisen takin hmalam pan zel rawh; Pathianin i hnam nihna a pek che kha zahpui lovin huaisen takin lan chhuahtir la, i nihna dik tak pholang ngam rawh. Adera nun leh dawt ngainatna hi sual tinreng bul a ni tih hre reng rawh. Hnam hmeltha kairual ber pawl nia kan lanna hian belhchian a van dâwl lo tehlul em! Chuvangin, takna, dikna, rinawmna nen he ram hi i dintharleh teh ang u.