Kar tawp khan tualchhung league khelh chhunzawm a ni a, inkhel hmuhnawm tak takah hnuhma thar hnutchhiah thar a awm belh nual. Kar tawp football hnuhma langsar kan hrut kual leh ang.
- English Premier League
‘Kan sawi thin, kan sawi nawn leh dawn’ tih ang deuh khan Erling Braut Haaland goal thun leh a record chungchang hi sawi thar a ngai fo thin a. Haaland goal thun tur sawi lovin a kalh a kim lova, sawi lovin kan awm thei thin lo. Haaland hian Pathianni zanah Arsenal nen 2-2 a an inhnehtawk tumin hmahruaina goal a thun. Haaland hian Manchester City tan inelna hrang hrangah vawi 105 khelin goal 100 a thun tling der tawh. Haaland hian club khat tan goal thun rang ber Cristiano Ronaldo record lo siam tawh chu a tluk. Cristiano Ronaldo hian Real Madrid tan game 105 atangin goal 100 a thun tling a. Club khat tan goal 100 thun tling rang ber record a lo siam tawh chu Haaland hian arawn nih rual.
Tualchhung league harsa bera ngaih EPL-ah top-scorer ni zawn tawh Haaland hian season tharah vawi nga khelin, goal 10 a thun tling der tawh a. A lungthu kim nan EPL top-scorer nih theihna hun tha tak a nei.
EPL hmahruaitu Manchester City hi an mualah khelh 32 ngawt tlawm nei lovin an kal tluang tawh a. EPL ah bik an muala an tlawm hnuhnun ber tum chu November 2022-ah Brentford an hneh lo kha a ni. Brentford an hneh loh hnu hian an muala inelna hrang hrangah vawi 46 zet tlawm nei lovin an kaltluang tawh nghe nghe a ni.
Inrinni zan khan Chelsea chuan London-a an elpui West Ham United chu 3-0 in an hneh. He inkhelah hian Chelsea tan Nicolas Jackson chuan minute 18 chhung lekin goal hnih a thun hman a. Jackson hi Drogba hnu lamah Blues tan goal thun zawn rang ber a ni. Chelsea forward ropui Didier Drogba hian January 2005 a Middlesbrough an hmachhawn tumin inkhel tan atanga minute 17 chhungin goal hnih a thun hman.
Inrinni zanah Tottenham in 3-1 Brentford an hneh tum khan Spurs captain Son Heung-min chuan assist a nei a, Tottenham tan assist ngah lamah Christian Eriksen a khum a, Spurs tan assist ngah ber dawttu niin a chungah hian assist vawi 67 nei tawh Darren Anderton a awm. Son hian asssist vawi 63 a nei ve tawh bawk.
- Spanish La Liga
Champion lai Real Madrid chuan Inrinni zana an mikhual Espanyol chu 4-1 in an hneh. Real Madrid hi La Liga-ah khelh 38 chhung tlawm nei lovin an kal tluang ta a, La Liga-ah tlawm nei lova kal tluang rei pahnihna Real Sociedad record an nihrual. Los Blancos hi an muala La Liga an khelhah vawi 27 zet an chak zawn tawh bawk.
Kum kal mekah Dani Carvajal chuan club leh ram tan inelna hrang hrangah goal 6 a thun der tawh a. Hei hi kum khat chhunga club leh ram tan goal a thun tam ber a ni ta hial a ni.
FC Barcelona tan Robert Lewandowski a chetha chhunzawm zel. Lewandoski hian season kal mekah khelh li chhung chu goal hnih chin a thun zawn tawh.
Iago Aspas chuan goal 159 a thun tling ta a, Aspas hian La Liga-a goal thun tam lamah Aritz Aduriz a khum a, La Liga a goal thun hnem 20-na chiah a ni.
- Italian Serie A
Christian Pulisic chuan Inter Milan tan goal 31 a thawkchhuak tawh a, Season liam ta tan atang khan Serie A player zingah goal thawkchhuak hnem ber a ni a. USA player zingah Derby della Madonnina a goal thun thei hmasa ber a ni bawk.
- German Bundesliga
Season liam ta tan tirh atang tun thlengin Bayer Leverkusen chuan stoppage-time ah chakna goal vawi nga ngawt an thun tawh a, Top 5 European Leagues-ah hun tawp dawna chakna goal thun hnem lamah Real Madrid an nih rual a, an chungah hian stoppage-time a chakna goal vawi sarih ngawt thun tawh Villarreal an awm.
- French Ligue 1
Zirtawp zan khan Nice chuan an mikhual Saint-Etienne chu 8-0 ngawtin an sawp. Nice hian chawlhlawk hmain goal ruk ngawt an thun hman a, hei hi Ligue 1-ah a thlen vawi khatna a ni a. Tui let hnu lamah Nice hi Ligue-a an khingpuite lakah chawlhlawk hmaa goal ruk thun thei hmasa ber an ni.