Nimin khan DC Conference Hall, Champhaiah K. Sapdanga, Home Minister leh Champhai District a sawrkâr office hrang hranga Head of Office-te leh YMA Sub Headquarters hruaitute’n inkawm hona hun an hmang.
K. Sapdanga chuan, “Champhai hi tun hnai mai ni lo, hun eng emaw chen kalta atang khan a tha lo zawngin kan hming a thang viau mai a, hei hi a siam that hna kan thawh vat a ngai a ni. Tun laia kan ramin a buaipui ber chu ruihhlo a ni a, hei hi thapui thawha kan do tlan a ngai a ni. Police kuta dah vek chi pawh a ni lova, an ni hian ruihhlo ringawt an buaipui thei lova, kan zavaia theihtawp kan chhuah a ngai a ni,” tiin, “Kan thalaite nunna hlu tak kan chan nasa em em a, ruihhlo thahnem tak kan man avang hian a hluar zual ang a sawi theih a ni ve a, man lo ila harsatna a siam tur hi a rapthlak em em zawk a ni, ruihhlo man thawm kan hriat hian hlawhtlinna hmu ah kan inngai a ni,” a ti bawk.
Home Minister chuan, “Kuhva chungchangah pawh theih tawp kan chhuah zel a, hmasawnna pawh kan hmu zel bawk a ni. Kuhva hi kan sawrkâr tirh phat khan kan buaipui nasa hle mai a, kuhva kaihhnawih a sum che vel hian kan rilru a hruai kawi nasa hle in a lang a ni. Kuhva chinga ei zawngte’n harsatna an tawh phah hial a ni, awlsam taka sum hmuh duhna thinlung hi kan kal san a ngai a, Champhai District hi district pawimawh tak mai a ni a, ramri a awm a nih mai bakah ei leh barah pawh Mizoram innghahna tlak ni thei turin a ram leiung hi a tha a, chu mi hai chhuak tur chuan sawrkâr pawhin ngaihtuahna a seng nasa hle a ni,” a ti.
Sâpa chuan, “ZPM te hi la sawrkâr ngai lo kan ni a, kawng thenkhatah duhthu kan la sam lo hle tih pawh kan hria, sawrkar hnathawkte hi kan kut leh ke an ni lo thei lova, sawrkârna a lo inthlak hian party chuan duhdan leh policy te kan lo nei ve a, he kan policy hi a hlawhtlin theihna tura min thawhpui leh min thlawp turin kan insawm nawn leh a ni,” a ti bawk.
He meeting-ah hian khawtlangin harsatna hrang hrang leh mamawh an neihte sawi ho a ni a, department hrang hrangte hmalakna leh hmachhawpte ngaih thlak a nih bakah harsatna an tawhte chin fel dan tur leh hmalak zel dan turte zau taka sawi ho nghal a ni.