Lok Sabha Speaker Om Birla, Rajya Sabha Deputy Chairman Harivansh Narayan Singh leh Official pawimawh hrang hrangte chuan September ni 27 & 28, 2024 chhunga Commonwealth Parliamentary Association (CPA), India Region, Zone-III Annual Conference vawi 21-an hmang turin nimin khan Aizawl an rawn thleng.
Lok Sabha Speaker leh Rajya Sabha Deputy Chairman te hi Mizoram Speaker Lalbiakzama, Lok Sabha MP Richard Vanlalhmangaiha, Deputy Speaker Lalfamkima leh Official dangte’n an lo dawngsawng a ni.
Ruahman lawk ang chuan vawiin, September ni 27 chawhma dar 11:00 ah Lok Sabha Speaker Om Birla chuan MLA Library-a Archive Cell thar a hawng ang a, dar 11:30 ah Commonwealth Parliamentary Association Annual Conference hman zui a ni ang. Mizoram Speaker Lalbiakzama’n palai zawng zawngte lawmna thu a sawi zawhah Nagaland Speaker leh CPA Zone-III Chairman ni bawk Sharingain Longkumer-in keynote address a sawi ang a; Mizoram Chief Minister Lalduhoma, Rajya Sabha Dy. Chairman Harivansh Nayaran Singh leh Lok Sabha Speaker Om Birla te’n thu an sawi zui dawn a ni. A ni khatnaah hian ‘Inclusion of the Northeast Region in the India-ASEAN Vision for Trade and Cooperation’ tih chu an sawiho dawn a ni.
CPA Annual Conference ni hnihnaah ‘Merging the Ministry of DONER with NEC for better strategic planning and coordination of various projects in the region’ tih sawiho a ni ang a. Hemi hnu hian Conference kharna hun hman a ni ang a, Speaker Lalbiakzama leh Chief Minister Lalduhoma te’n thu an sawi hnuah Mizoram Parliamentary Affairs Minister Vanlalhlana’n lawmthu sawina hun hmangin Conference a khar dawn a ni.