Nimin khan Sihphir Higher Secondary School Building thar chu Lalthansanga Minister, EF&CC, Soil Dept’ etc chuan Chief Guest niin a hawng.
Lalthansanga chuan thusawiin, “Ram leh hnam din chhuahna pawimawh tak mai, zirna kawngah Zoramin hma kan sawn zel a, chutih laiin tih tur hmabak tamtak tuna sorkar pawhin kan la nei a ni. A bikin Higher & Technical leh Education Minister Dr Vanlalthlana pawhin nasa takin zirna kawnga hma kan sawn theih nan hma a la chho zel a, system thar pawh kan hmu nual tawh a ni. Zirnaah hian chhungkuaa ṭan ho a ngaia, khawtlang anga ṭan ho a ngaia, naupang leh zirtirtute kuta kan dah ngawt chuan result ṭha neih a har em em a. Naupang thiam thei tak mai te pawh hi chhungkuaah back up tu an neih ṭhat loh chuan an zuih ral fo mai a ni, chhungkua leh zirtirtute ti phura cho chhuak tur chuan khawtlang kan pawimawh em em a, tute mah hi inthlahdah thei kan ni lo a ni. Khawtlang sualna te kan vei a, nu leh pate kan rum a, Kohhran kan rilru a hah a ni. Sual hi thawk leh khata tih bo vek theih ni lo mahse school naupang an nih laia khuah khirhna ṭha an dawn te, nitin zirtirna ṭha an dawn te hi chhungkuaah lo chhawm nung zui zel i la chu kan ram sualna te pawh hi heti em em hi a nih loh deuh ka ring. Zirna school ṭha hian kan hnam a hum hima, a chhan tlat a, a chawi kang bawk,” a ti.
Chatea chuan, “Sihphir khawtlang pawhin kum 2008 ah daih tawh khan khawtlang ṭang rualin he Higher Secondary School hi in lo din tawh a, kum 16 hmel a lo hmu ta a ni. Vawiin ni thlenga sorkar school pawh la ni lovin zirlai 150 chuang in nei thei te, pawl 12 result ṭha tak mai in nei ṭhin te hi in fakawm ka ti a, zirtirtute thawhrim rah a nih piah lamah khawtlang mipuite pawh inṭang hle tih a hmuh theih a ni, vawiin ni ah sorkar hmasa aṭanga bul lo ṭan tawh zirna In ṭha tak mai in nei tur hi ka lawmpui che u a, Mizoram zirnain hma a sawn zel theihnan tha thlah lova ṭang mar pat turin ka ngen duh che u a ni”, a ti bawk.
Sihphir Higher Secondary School hi Lumpsum Aided a ni a, a building thar hi sorkar hmasa aṭanga bul ṭan niin NABARD- RIDF – XXVI (2020-2021) kal tlangin cheng nuai 70 senga sak a ni a, khawtlang mipuiin sum an thawh tel bawk.
He hunah hian R Lalbiakzuala, Addl.Secretary, Education Department chuan Lalthansanga Minister hi a ṭawiawm a ni.