- Ruata
Maruti Suzuki Dzire chu tlangzarh theih tura peih a ni thawkhat tawh a, company lam chuan la puangzar lo mahse November ni 4 bawr chho, Diwali zawh veleh an tlangzarh beisei a ni.
Maruti Suzuki Dzire thar tur hi generation thar model a nih dawn avangin a landan leh a khawl bakah kawng tam takah a rawn danglam dawrh dawn a. Tunhnaia a thlalak darh atanga a lan danin a rawn mawi viau dawn a, tuna chhuak mek nen a inang lo viau a ni.
Maruti Dzine hi sub 4 meter sedan huanga awm niin sedan nihphung nei, lian lutuk si lo a ni a. India ramah chuan lei a hlawh em em a, khualzin phurhna atanga mimal hman tur thlengin lei a hlawh viau a. India rama passenger car hralh tam zinga tel reng a ni.
Sedan nihphung a neih avangin a hnunga bungraw phurhna a zau tha a. Amah a inthazoin kawngah a nghet tha bawk a. Lirthei tha tak mai a ni a, chhungkaw tan pawha tangkai tak, family car hliah hliah te pawh a tih theih ang a, khualzin phur, rental car atan pawha hman nasat em em a ni bawk a ni.
A thar turah hian a vawikhat nan sunroof kan hmu dawn a, heng bakah hian kentel hrang hrang – 360-degree camera, wireless phone charging, 9-inch touchscreen infotainment system with wireless Apple CarPlay and Android Auto, ARKAMYS sound system, HUD (head-up display), analog instrument cluster with 4.2-inch digital MID, rear AC vent, HVAC control thar, leh automatic climate control te kan hmu dawn bawk a ni.
A khawl lamah pawh a thar, Suzuki khawl thar 1.2L, three-cylinder Z12E petrol engine kan hmu dawn a. He khawl hian 82bhp power leh 112Nm torque a pechhuak thei a ni.