BJP Mizoram chuan India hnampa Mahatma Gandhi pianchampha vawi 155-na denchhenin nimin zing Dar 8:00 khan Pachhunga University College Campus-a Gandhi lim ah zahna pangpar hlanna an nei a. BJP Mizoram State President Vanlalhmuaka, State General Secretary Malsawmtluanga, State Secretary Dr. Zonuntluanga te bakah state hruaitu dangten pangpar hi an dah a ni.
He ni pual hian Vanlalhmuaka chuan, “India ramin zalenna kan neih aṭanga hmasawnna kan hmuh hi a ropui hle a, zalenna kan neihna tur a sulsutu Mahatma Gandhi India hnampa tia sawi a ni hial a ni. India ramin zalenna kan neih hnuah BJP Narendra Modi kaihhruaina hnuaiah India ram chu khawvela ram ṭhang chak leh ṭhang duang berte zingah kan awm tawh a, khawvelah pawh India chu zalen takin kan leng mek a ni. Chutiang chuan India ramin kawngtin renga hma a sawn laiin keini India hmarchhak ram leh India ramah pawh ram ral muang ber ni si a, hmasawnna kawnga ke kan pen hleithei lo hi a pawi hle a, mipui pawh hian kan zalenna kan hman thiam ve a hun ta hle a ni,” a ti.
BJP Mizoram hian kum tinin Gandhi Jayanti pual hian India hnampa chawimawina leh zahna hlanna hun an hmang ṭhin a, hei mai bakah hian faina hnatlang neih ṭhin a ni bawk. Nimin chawhnuah pawh khan Aijal Club Park chhung leh a bul vel tihfai hnatlang neiin, Plastic lam chite chhar fai hna an thawk a ni.