- Vanlalzawma, Muallungthu
Zân dang ang lo takin khua chu a thiang nuam hle mai a. Thla eng lah chu a mawi em em mai. Heti anga khua a han thian hi chuan khua chuana han hawivel pawh a nuam bik a. Zân lama eizawng chi ramsa leh chiapcha chitin rengte chuan thawm an rawn nei tan a. Inchung di-so a Vamur zanriakte chu an lo che ri ve set set hlawm a. Zân lama eizawng chiten mahni tawka thawm an chhuah ri han hriat phei chuan he khawvel boruak hi a nuam lehzual bik hian a hriat theih hial nia!
Dârnâm tuikhur bul, thlan mual pangpera Sihal ü ri leh veng lehlama tlangval rualkhat, nula rim ten; thla eng hnuaia zai an han vawr ri te, a khat tawka Vabak thir chhêr ri kauh kauh hriat tur a han awm leh zauh thin te chuan amah rualute tawngka hawh lawk ila, kan thatlai; kan vanglai hun min ngaihtuah chhuah tîr a . Mi thenkhatten fiamthuin, ” Bâwng tar pawhin luang no apiang a duh e” an han ti thin tak naa; luang note pawh hi Bâwng tar peh atân an chawrno ve thin zawk a ni lo maw tia ngaihtuahna sen mai pawh a awl duh viau mai ka ti!
Van hnuai lei hringmi danin ni leh thla, kum sul a han liam a. Hnahnêm te pawhin chawrno an rawn chhuah tan ve leh ta hlep hlep mai. Chutih rualin, hnahnêm thenkhatte erawh thung chuan chuai zai an rel veleh pheuh pheuh ta thung a. Hun hian kan hringnun kal lai pawh hi nawrbo tumin nitin zantin, huntîn min chhiarkhum chho zêl a. Kan hun chhiar mek te chu nunhluiah an chang zo thin. Kan nunhluite chu ngaiin chelhdin han tum ngial thin mahila, hringmi danin hunin a liampui zêl chu a nih si hi!
A kumchhira kan sawi fo, a hun ngaia lo herchhuak leh thin, thenkhatten fiamthu thawhnana an hman thin, “Kan ti nek nek a. ‘Bar’ thla kan lo thleng leh ta reng mai ti ti suh ang che. In tih nek nek vanga thleng kan ni lo. A hunah alo thleng a ni ve mai ” ti-a an fiamthu pui thin, kei erawhin hetiang hun kan chuangkai thei hi lawm sateha ka lawm thin, chu ‘Bar thla lungrun’ chu kan lo chuangkai chho leh tan ta reng mai.
Heti ang hun hmu pha loa vanduaithlak taka rualduhten mual min liamsan laia, Pathian zahngaihna avang liau liaua he hun kan thleng thei hi ka lawmna tuifinriat angin a luangliam hial asin! Pathian ngaihsak leh tih mi, nitin nunphunga Pathian hre renga khawsa tam tak kârah, Pathian ngaihsak ang taka lang, thenawmte leh khawtlangin an nunphunga Pathian ngaihsakna leh tihna kan hmuh hauh siloh; kâwra hmanga Chawlhni inkhawm thulh lêm lo, Biak in lamtuala lâm chhuak thei reng mai, an nunphunga Pathian thutak nunpui hauh si lo, mahni mihring pui pawh zahderna nei miah lo leh Pathian pawh hlau chuang lote pawhin he ‘Bar thla’ lo herchhuak hi chu an hlimpui ve ang em tih te hi ka ngaihtuah thin zu nia!
He hun lo thleng hian keini hringmite khawsak phûng inthlau lutuk te hi min ngaihtuah chhuah tîr leh thin a. Biak In lamtuala Chawlhni apianga lam vir chai chai thin, a rûka thenawm khawvengten hnawksak tia an sawi rûk sêp sêp thin te pawh hian Siamtu duan he khawvel mawina hi an thlir ve thin ang em tih te min ngaihtuahtir fo a. Vantlang kawngpui pawh zah lo, duhâmna avanga vantlang kawng nêk chêp hreh miah lote, kohhran leh khawtlanga inhmang tak, zonun zemawi leh Kristian nundan mawi nunpui chuang lo, incheina atana khawtlanga lansarh khêl mite pawh hian he hun lo herchhuak hi an hmuh hian Siamtu ropuina hi an ngaihtuah ve ngai ang em tih te min ngaihtuahtir thin zu nia!
Kumtluana a sûr a sâ hnuaia kan thawhrim rah chu seng theih a lo ni dawn ta a. A tlém emaw a tam emaw, a hlawk emaw hlawk lo emaw, keini thingtlang loneitute tan chuan chu tluka hlu chu a awm lo. Kan thlai leh buh tharte han sengkhawm hlimawmzia chu thudang, mi tam takin min chhuhsak theih hauh loh nun hlimna chuan min tuam a. Chutah, favang tlaitla lenkawl eng no riai chu han thlir ila, rilru hi a hlim ru veng veng mai asin. Ngaihloh ha bal chhem ai chuan nuam veng veng tak a ni!
He ‘Bar thla lungrun’ hi a lo herchhuah meuh chuan keini hringmite nunphung hi eng emawti tak hian a khawih a. Kan lei hringnun nen hian inzawmna thûk tak a nei ti ila kan sawi sual tam awm lo e. ‘Bar thla lungrun’ hi a lo herchhuah tawh chuan X-Mas kan hnaih a, kum thar kan hnaih zual zel a ni tih kan hria a. Engtin emaw tak hian kan rilru hi a awm a, min mawlh emaw ni dawn ni, kan ti deuh huih thei hial asin.
Zirna avang te, eizawnna avang tea ram hla tak taka khualchan changte pawh hi he hun a lo thlen hi chuan an rilru hi tih danglamin a awm ve ngei hian ka ring thin. thenkhatte chu lenrual lungduh ngaih vang te pawh kan ni ang. thenkhat erawh di zun ngaiin, phurhzawh loh zun-a uai te pawh kan ni ang. thenkhat dang leh te chu duhtak sûn tawh, lungngai taka indawm kûn tawh te pawh kan ni ang. Chutih rualin, thenkhatte chu mahni lum luma lum, changpat chehchhum ang maia tal ve mai mai te pawh kan ni maithei e.
Englekhawle, chuti ang mi chu an ni emaw ni lo emaw; eng ang mi pawh ni ila, kumpui sul a han vei a, he ‘Bar thla lungrun’ a lo herchhuah meuh hi chuan khawtlang lunglen tal hi mi; tute mai pawh hian an phûr ve ngei tur a ni.
Ni e, an phur ngei ngei ang; ka ring!