October 3, Ningani zan khan Europa Conference League 2024-25 khelh tan a ni a, champion tura rinkai zinga mi Chelsea chuan awlsam takin hnehna an chang nghal. Inkhel dangah Hearts chuan vanneihthlak takin hnehna an chang ve bawk.
English club lian Chelsea hian Stamford Bridge-ah Belgian club Gent an mikhual a, an mikhualte hi an B team in an hmachhawn. EPL leh inelna danga khel tlem zawk an rawlthar player tam zawk te hmuhnawm takin an inlan a, an mikhualte hi 4-2 a hnehin, an mualah harsatna lian an tawk lo.
Chelsea hian an mualah bul an tan tha viau a, inkhel tan atanga minute 12-na lekah Renato Veiga chuan hmahruaina goal a thun. An mualah khelh tha viau mah se chawlhlawk hmain goal dang an thun belh thei lo thung.
Chawlhlawk hnu lamah inkhel a hmuhnawm chhunzawm a, goal nga ngawt a luh belh, Chelsea tan hian Pedro Neto, Christopher Nkunku leh Kiernan Dewsbury-Hall ten goal an thun belh leh. Mikhual team tan hian Tsuyoshi Watanabe – leh Omri Gandelman ten goal thun bawk mah se Chelsea lakah tlawm an pumpelh zo ta chuang lo a ni.
Ninga zanah inkhel dangah Hearts chuan minute 90+4 a Dhanda goal thun hmangin Dinamo Minsk a hneh nawlh ve nawlh bawk.