Nimin khan Congress Party chuan Congress Bhavan-ah ‘Mahatma Gandhi 155th Birth Anniversary’ lawmna hun an hmang a. He hunah hian Lalnunmawia Chuaungo, Sr. Vice President, MPCC chuan thusawiin, “ZPM sawrkar hi sawisel pawh a la hun lo va, sawrkarna an chelh ve chauh a, kum khat pawh a la tling lo a ni. An sawrkar hma in thil tha pui pui, an duhthusam an sawi nasa a, chumi vang chuan mipuiin an thlang tling a. Kum khat tlin hma-a sawisel hi kan duh lo va, chak pawh kan chak lo a ni. Amaherawhchu, ram leh mipui tana thil pawi an khawih tak mawlh mawlhah chuan mipuite thlahvang hauh in kan rawn ti ve ta zeuh zeuh a ni. An thil tihsual zawng zawng hi sawi zel dawn chuan mi nin khawp sawi tur a awm a ni. Anmahni thlang tling tute beisei pawh an pha lo nasa a, tawngchhuak hial te pawh an awm tawh a ni. Taxi ah han chuang ila, an titi atangin a hriat a ni,” a ti.
Nunmawia chuan, ZPM chetsual avanga sawrkar tur kan ni lova, engvangin nge ram rorelna fawng chelh tur kan ni tih hi kan rilru ah chiang se la. Ram leh mipuite tana rawngbawlna pawimawh ani a, ram hmasawn zawk te ruala kan pen ve theihna tur hi kan tum bulpui ber nise ka duh a ni, tia sawiin.
MP inthlanah khan chak zo lo mah ila, Congress party hian hma kan sawn nasa em em a ni. Mi thil chikmi te chuan MP inthlan lehah chuan Congress kan sawrkar ngei an ring a ni. Chuvangin Congress hmabak hi a eng a, Mizoramah pawh, ‘Congress bak hi beiseina nghahna tur an awm lo anih hi mawle,’ ti an tam tawh a ni, a ti a.
“Keini tih tur chu ram rorelna siamthat leh mirethei, kuthnathawktute, mahni kutkawiha eizawngte hmakhua hi kan dahsan ber tur te zing ami a ni a. Thingtlang kuthnathawktute chauh ni lo, khawpuia sawrkar hnathawk ve lo eizawnna hrang hrang thawk te tan pawh ruahmanna kan siam dawn a ni. Congress chuan kan ti ang kan tih chu kan ti thin, NLUP ah khan a chiang em em a ni,” a ti bawk.
Gandhi 155th Birth Aniversarry puala thu sawitu C. Chawngkunga, General Secretary, MPCC chuan,”1969 October ni 2-ah khan Mahatma Gandhi piancham lawmna tur programe District Council khan kan duang a, chutih lai chuan MNF khan an dodal a. Vawiin ni ah chuan India Hnampa Mahatma Gandhi chanchin zalen takin kan sawi thei a, hei hi Indian National Congress vang a ni, tiin. India National Congress President 39-na Mahatma Gandhi hi Gujarat a Porbandar khua ah a lo piang a. Banyan hnam an ni a, Gandhi ho chu Bungbel zuar thin an ni. Gandhi a hi sap ramah a awm laiin a piangthar a, sap kawrchung a hak thin chu bansan in, India ramah a rawn haw a, hrenpereng leh India incheina nen a nung chho ta a ni, a ti.
Gandhi hian Congress worker te chu tlawmna a rawn zirtir a, dawih zawk ni ngam khawpin a huaisen a. India mipuite chu zirtirna tha a rawn zirtir ta a ni. India rama hnam hrang hrang te chu pangpar ang an ni a, tumah dipdal lovin an lo par chhuak ang hian a tehkhin a, Constitution siamtute pawh hnam tenau te humhalhna dan te dah turin thurawn a pe a ni.” a ti bawk.
Nimina an hun hman hi RL Valla, Vice President, MPCC chuan a kaihruai a ni.