October 3, Ningani zan khan Europa League khelh chhunzawm a ni a, Mimualah Manchester United an chak zo lo. FC Porto lakah si hniha hma an hruai chunga an chak zawh loh vangin United manager Erik ten Hag dinhmun a derthawng leh zual sauh. United an chak zawh loh lai hian Tottenham chuan Mimualah hnehna an chang ve thung.
- United an che fuh lo
Season thara inelna hrang hranga beisei phak lo Manchester United hi Portugal club lian FC Porto hmachhawn turin Estádio do Dragão-ah an lenglut a, an len luhna mualah tha takin bul an tan a, si hnih faiin hma an hruai hman hial. Si hnih ngawtin hmahruai hman mah se an hmahruaina an humhim zo lova, Porto nen hian 3-3 in an inhnehtawk. Porto nen an inhnehtawk tum hian United captain Bruno Fernandes hnawhchhuah a ni a. Fernandes hian United tan a khelh hnuhnung pahnihah Red card a hmu ve ve.
United hian Porto an ngam hle a, goal an thun hma hle. Inkhel tan atanga minute sarihna lekah season kal meka beisei phak lo Marcus Rashford chuan hmahruaina goal a thun a, manager in a chunga a rinna a nghah tlatna chu goal hmangin a chhang let. Rashford goal thun hnu hian United an khel tha zui viau a, goal pawh an thun leh thuai. Hliam vanga chawl deuh vang vang Rasmus Højlund chuan minute 20-naah goal thunin an hmahruaina a tizau. Hliam vanga chawl reng Rasmus Højlund hian Pathianni zana Tottenham an hneh loh tum khan hun tawp dawn hnaih lamah mual chhung a lut a. A dam hnua bul a tanna hmasa berah goal thunin, United mamawh a nihzia goal hmangin a lantir.
Minute 20 chhung leka goal hnih an thun hman vangin United hian hnehna an chan ngei a rinawm hman viau. Porto lakah an chak a nih chuan manager Erik ten Hag tan a hma lam hunah beiseina thar a nei thei tura ngaih a ni a, an manager vang pawhin chak an tumruh viau bawk. Hma takah goal hnih thun mah se chawlhlawk hmain goal hnih an chhuah hman ta tlat thung. FC Porto tan hian Pepê chuan minute 27-naah goal thunin an si phurh a sut then. Pepe goal hian Portuguese club a fuih phur viau a, goal pawh an thun belh leh thuai. Pepe goal thun atanga minute sarih hnu lekah Samu Omorodion chuan goal thunin an si phurh a sut zo a, 2-2 a inhnehtawk chungin chawlhlawk an hmang.
Chawlhlawk hnu lamah United an talbuai a, tlawm zawkah an tang teuh hle. Goal hnih an thun zawn vanga phur tak FC Porto hial second half ah bul an tan tha viau a, goal pawh an thun thuai. An goal hnihna thuntu Samu Omorodion chuan minute 50-naah an goal thumna leh hma an hruai letna goal a thun. He goal hmang hian hun rei tak chhung hma an hruai a, team lian lakah an chak mai a rinawm hman. An si phurh sut tuma United in tan an khawh vanglaiin an captain Bruno Fernandes chu minute 81-naah hnawhchhuah a ni. Si phur zawk chunga tlem zawk an nih leh zel vangin United dinhmun a chhe hman hle. Dinhmun chhe takah ding hman mah se defender Harry Maguire chuan minute 90+1-ah goal pawimawh tak a thun nawlh a, United tlawm tur a chhanhim a, 3-3 in an inhnehtawk zui ta a ni.
FC Porto lakah an chak zawh leh tak loh vangin EPL a bul tan chhia Manchester United chuan Europa League lamah pawh bul an tan chhe viau. Red Devils hian Europa League season tharah vawi hnih an khel tawh a, chak zo lo ve vein point ruk hmuh theihna turah point hnih chiah an la hmu a. Team 36 inel zingah 20-naah an awm mek a ni. An inhnehtawkpui tak FC Porto khan point khat chauh an la hmu a, United hnuaiah an awm ve leh chhawng.
- Pathumnaah Tottenham
English club lian Manchester United an chak zawh loh lai hian London club lian Tottenham chu Hungary rama an zinnaah 2-1 in hnehna an chang ve thung. Pathianni zana United sawptu Tottenham hian Groupama Arena-a an khingpui Ferencvaros chu 2-1 in an hneh a, table-ah pathumna an luah.
Tottenham tan hian Pape Matar Sarr chuan minute 23-naah an hmahruaina goal a thun. Sarr goal hmanga hma an hruai reng hnuin hun tawp dawn hnaih minute 86-naah Brennan Johnson chuan an goal hnihna thunin, an hmahruaina a tizau. Mualneitu Ferencvaros tan hian Barnabás Varga chuan minute 90-naah goal thun mah se Spurs lakah tlawm an pumpelh zo ta chuang lo a ni.
- Result dang
Ningani zana inkhel dangah Italian club lian AS Roma an tlawm. Roma hian Sweden club IF Elfsborg an tlawh a, minute 44-naa Michael Baidoo penalty pet goal vangin tlawm zawkah an tang.
Roma an tlawm lai hian Italian club dang Lazio chuan an mikhual Nice lakah awlsam takin hnehna an chang ve thung. Lazio tan hian ‘Valentín Castellanos chuan goal hnih a thun a, Pedro leh Mattia Zaccagni ten goal khat ve ve an thun a. Nice goal neih chhun hi minute 41-naa Jérémie Boga thun a ni.
Ningani zana hnehna chang langsar zingah Eintracht Frankfurt, Lyon leh Mizoram a lo kal tawh TSG Hoffenheim te an tel.