Inrinni zana English Premier League khelh team lian Liverpool, Manchester City leh Arsenal ten hnehna an chang a, table chung lamah danglam a awm lo. Inrinni zana EPL result langsar zual kan hrut kual ang.
- Liverpool 1-0 Palace
Table-a hmahruai mektu Liverpool chuan Selhurst Park-ah Crystal Palace an hmachhawn a, tlahniam thei dinhmuna ding mek lakah Diogo Jota goal thun hmangin hnehna an chang a, table-ah hma an hruai chhunzawm.
Selhurst Park-a lenglut Reds hian bul an tan tha viau a, minute 9-na lekah Diogo Jota chuan Cody Gakpo siamsak atangin goal a thun a. Minute kuana leka Jota goal thun hmangin an chak a, point thum an hmu. Manager thar Arne Slot hnuaia khel tha tak Liverpool hian EPL season tharah vawi 7 khel tawhin point 18 an hmu a. Manchester City leh Arsenal chungah an awm chhunzawm.
- Haaland awl zan
Inrinni zana inkhel dangah champion lai Manchester City chuan an mikhual Fulham chu 3-2 in an hneh. Fulham laka goal thum an thun tum hian season thara goal 10 zet thun tling tawh Haaland chuan goal a thun lo va, a awl ve teh tlat.
Chak tura rinkai zawk City hian an mualah bul an tan tha lova goal chhuah hmasa zawkah an tang. Fulham tan hian Andreas Pereira chuan minute 26-naah hmahruaina goal a thun a, City a barakhaih. Goal chhuah hmasa zawkah tang mah se City an hawihai rei lo thung. Midfielder Mateo Kovacic chuan minute 32-naah goal thunin an si phurh a sut a, 1-1 a inhnehtawk chungin chawlhlawk an hmang.
Second half-ah City in bul an tan tha viau a, goal an thun hma hle. Second half tan atanga minute hnihna lekah Kovacic chuan an goal hnihna leh an hmahruai letna goal a thun. Goal lut a awm belh theih loh reng hnuin Jérémy Doku chuan minute 82-naah City goal thumna a thun a, an hmahruaina a tizau. Fulham tan hian Rodrigo Muniz chuan minute 88-naah goal thun bawk mah se an si phurh an sut zo hman tawh lo.
- Arsenal in Southampton an lehthal
Season thara tlawm la nei lo Arsenal chuan Emirates Stadium-ah kai thar Southampton an mikhual a, si an phurh hmasak zet hnuin 3-1 in hnehna an chang let.
Emirates Stadium ah rin phak bakin Arsenal leh Southampton an inhnehtawk a, chawlhlawk hmain goal lut a awm thei lo hial. Chawlhlawk hnu lamah inkhel hmuhnawm zawk hmuh tur a awm a, goal li ngawt a lut. Second half tan tirh lam minute 55-naah Cameron Archer chuan Saints hmahruaina goal a thun a, Arsenal a barakhaih.
Archer goal hian Gunners a barakhaih harh zawk a, tha zawkin an inlan zui nghal zat. Goal an chhuah atanga minute thumna lekah Kai Havertz chuan goal thunin an si phurh a sut. Havertz goal thun atang minute 10-naah Gabriel Martinelli chuan hma an hruai letna goal a thun a. Hun tawp dawn hnaih minute 88-naah Bukayo Saka chuan an goal thumna a thun zui leh a, Laipui vawi thum puak zawn chhawr tangkaiin Gunners hian an mualah point thum an hmu zui ta a ni.
Arsenal laka an tlawm tum hian Arsenal si nghak hlui Aaron Ramsdale chu Emirates Stadium-ah a vawi khat nan a inlan a, lawm a hlawh hle nghe nghe.
- Wolves an bet tual tual
Inrinni zana inkhel dangah table hnuai bera awm mek Wolves chu Brentford lakah 5-3 in an tlawm a, a hnuai ber luahin an bet nghet tual tual.
Season thara chak la nei miah lo Wolves lakah Brentford in bul an tan tha viau a, inkhel tan atanga minute hnihna lekah Nathan Collins chuan hmahruaina goal a thun nghal. Goal chhuah hma viau mah se Wolves an buai bik lo, Matheus Cunha chuan minute lina lekah goal thunin an si phurh a sut nghal. Minute li chhung leka goal hnih a luh hnu hian Brentford tan Bryan Mbeumo, Christian Nørgaard, Ethan Pinnock leh Fábio Carvalho ten goal an thun zui leh a. Wolves tan Jørgen Strand Larsen leh Rayan Aït-Nouri ten goal thun bawk mah se point hmu tur khawpin an thochhuak zo tawh lo.
Wolves hian season tharah vawi 7 an khel tawh a, an result tha ber chu draw vawi khat an neih a ni a, vawi ruk ngawt tlawm zawkah tang tawhin point 1 chiah an la hmu. Wolves chung chiaha awm Southampton pawhin point khat chiah an la hmu a, Crystal Palace pawhin point thum bak an la hmu thei lo bawk.