Inrinni zana German Bundesliga khelhah champion lai Bayer Leverkusen an chak zo lo. Inkhel dangah team lian Borussia Dortmund an tlawm.
Champion lai Bayer Leverkusen hi an manager Xabi Alonso hnuaia vawi 100 an inlan tlinna a ni a, an muala minute riat chhung lekin goal hnih thun mah se an chak zo tlat lo thung. Hnehna nen Alonso century lawm an tumna chu uiawm takin an tipuitling zo ta lo a ni.
Leverkusen hian an mual BayArena-ah bul an tan tha viau a, an mikhual Holstein Kiel lakah goal an thun hma hle. Inkhel tan atanga minute lina lekah Victor Boniface chuan hmahruaina goal a thun nghal. Boniface goal thun atanga minute li hnu lekah Jonas Hofmann chuan an goal hnihna a thun belh zui leh zat a, minute 8 chhung lekin goal hnih an thun hman. Hma taka goal hnih an thun vangin awlsam taka chak thei tura ngaih an ni naa kai thar laka an hmahruaina an humhim zo bik lo.
Mikhual team Holstein Kiel tan hian Max Geschwill chuan minute 45’+5-ah goal thunin an si phurh a sut then a. Minute 69-naah Jann-Fiete Arp chuan penalty atanga goal thunin an si phurh a sut zo.
2-2 a nih hnuin Leverkusen in an khingpuite nawr na viau mah se goal an thun belh thei tawh lova, an mualah uiawm takin an chak lova, hmahruaitu Bayern Munich an hnaih theih loh phah. Champion lai Leverkusen hian season tharah match 6 atangin point 11 an hmu a, panganaah an awm mek. Hmahruaitu Bayern Munich nen an inkarah point hnihin an inthlau mek a, Bayern hian vawi khatin an khel tlem zawk.
Inrinni zana inkhel dangah team lian Borussia Dortmund chu 1. FC Union Berlin hneh lovin an tlawm.
Season thara khel tha 1. FC Union Berlin tan hian Kevin Vogt leh PenYorbe Vertessen ten goal an thun a, si hnih faia hmahruai chungin chawlhlawk an hmang. Chawlhlawk hnu lamah Dortmund an khel tha hret a, minute 62-naah Julian Ryerson chuan goal thunin an si phurh a sut then. Tlawm pumpelh tumin tha thawh nasa viau mah se hun tawp thlengin goal an thun belh thei tawh lova, Mimualah an tlawm zui ta a ni. An khingpui lakah an tlawm vangin pahnihna inhlangkai thei dinhmuna ding Dortmund hi pasarihnaah an awm zui phah ta a ni.