Pathianni zing khan Salt Lake City-ah UFC 307 neih a ni a, fight ngaihven hlawh berah Alex Pareira chuan knock-out a Khalil Rountree hnehin a kawnghren a humhim. Pareira hi light-heavyweight huangah a chungnung zui zel a, a kawnghren humhim zawn rang ber record thar a siam. Pathianni zinga kawnghren inchuhna dangah Julianna Pena a chak bawk.
Light-heavyweight champion kawnghren hreng mektu Pareira hian hnek na fahran Khalil Rountree a hmachhawn. Kut thlak na tak Rountree lakah hian Pareira hi fimkhur takin a inlan. A khingpui kutthlak natzia hrechiangin a inveng fimkhur a, fing taka inlanin a khingpui lakah chungnung zawk a ni thei. Fimkhur takin inlan bawk mah se round hnihnaah a talbuai zeuh a, a tlawm mai a hlauhawm hman.
Round hnihnaah tlawm a pumpelh hram hnuin a insiamtha a, round thumnaah tha taka a inlan hnuin round linaah a khingpui a knock-out ta hial a ni. Round linaah hian inhnek a thiamzia a lantir a, a khingpui a hnek fuh fova, knock-out in a chak zui ta nghe nghe a, a kawnghren a humhim leh ta a ni.
Alex Pareira hian ni 175 chhung lekin title fight vawi thum a hmachhawn hman a, fight vawi thum a hmachhawnah hian a chak vek. Vawi thum hnehna chang tura hun duh tlem ber a ni a, record thar a siam. Kawnghren humhim zawn rei record awmsa chu hmeichhe fighter lar Ronda Rousey record siam a ni a. Pareira hian Rousey record siam hi a rawn khum ta a ni.
Pathianni zinga kawnghren inchuhna dangah Julianna Pena chuan bantamweight title a hloh tawh a la let a, a khingpui Raquel Pennington lakah split decision in hnehna a chang. Kum 35 mi Pena hian round nga an khelh chhungin a khel tha zawk a, round lina tawp dawn lamah erawh a talbuai zauh thung. Round nga a zawh hnuin result puan niin endiktu pahnihin point 48-47 in Pena hi an chaktir a, endiktu pakhat chuan a khingpui Pennington an chaktir ve thung a. He thutlukna hi a hmuna entu mipuite chuan an au el hial nghe nghe a ni.
UFC 307 a fight dangah champion hlui Jose Aldo chu Mario Bautista lakah mak tak maiin a tlawm a. Aldo chak loh vanga lungawi lo langsar zingah McGregor a tel.
Kum 41 mi Aldo hian a khingpui a hnek fuh ngun zawk a, Bautista-a’n keuhthluk a tumna ata a him fo bawk. Chak zawk ni ngei tura ngaih a ni laiin endiktu pahnihte chuan Mario Bautista hi point 29-28 in an chaktir tlat thung a. He thutlukna hian mak tih a hlawh hle. Aldo lo hneh tawhtu Conor McGregor chuan Bautista chak dan hi a sawi sel a, Aldo hi chak zawk ni ngei tur a nih thu social media-ah a tar lang.