Inrinni zana Spanish La Liga khelhah Real Madrid in an mualah hnehna an chang a, hmahruaitu FC Barcelona point hmuh zat an hmu ve chiah.
Champion lai Real Madrid hian Santiago Bernabeu-ah Villareal an mikhual a, mipui 73,842 zet pungkhawm hmaah si hnih faiin hnehna an chang. Real Madrid tan hian minute 14-na lekah Federico Valverde chuan Luka Modric siamsak atangin hmahruaina goal a thun. Hma taka goal an thun hnuin goal lut a awm belh thei lo vang vang a. Hun tawp dawn hnaih minute 73-naah Vinícius Júnior chuan Valverde siamsak atangin an goal hnihna a thun a, an chakna a nemnghet. Vinicius Junior goal thun hnu hian goal dang a luh belh tawh lova, Real Madrid hian hnehna changin point thum an hmu ta a ni.
An mualah an chak vangin Real Madrid hian khelh 9 atangin point 21 an hmu a, hmahruaitu FC Barcelona point hmuh zat an hmu tling chiah. An elpui lian Barcelona hian vawi khatin an khel tlem zawk thung. Inrinni zana Villareal an hneh tum hian an captain Dani Carvajal chuan a khupah hliam na tak a tuar. Dani Carvajal hliam hi zai ngei a ngai dawn a, chawlh a mamawh rei tura ngaih a ni.