England player pahnih Ezri Konsa leh Morgan Gibbs-White ten Inrinni zan khan hliam an tuar a, ram tan an inlan thei dawn em tih a chiang lo.
Inrinni zanah Manchester United nen goal awm lova an inhnehtawk tumin Aston Villa defender Ezri Konsa chuan a khupah hliam a tuar a, minute 12-na lekah lakchhuah a ni. Inkhel tan tirhteah lakchhuah a ngaih vangin United a hmachhawn rei thei lo. A khup hliam vang hian eng chena rei nge a chawlh ngai dawn tih a la chiang lo. England in Greece leh Finland an hmachhawn hunah a inlan theih a beiseiawm loh viau thung.
Konsa a inhliam rual hian Nottingham Forrest defender Morgan Gibbs-White a hliam bawk a. White hi England tan a inlan thei dawn em tih a chiang lo bawk. Nottingham Forest hian Stamford Bridge-a an khingpui Chelsea lakah tlawm an pumpelh a, team lian lakah point hlu tak an hmu. Chelsea nen an inhnehtawk tum hian Gibbs-White hian hun tawp dawn hnaiah hliam a tuar a, minute 76-naah lakchhuah a ni.
Konsa leh Gibbs-White te hian manager lailawk Lee Carsley hnuaiah hmun pawimawh an chang a, September 10-ah Wembley-a an mikhual Finland an hneh tum khan an pahnih hian bul an tan ve ve. Greece leh Finland hmachhawn tur England squad-ah telh an ni leh a, Three Lions tan an inlan thei dawn em tih a chiang lo thung.
Manager lailawk Lee Carsley hnuaia bul tan tha England hian October 10-ah Creece an hmachhawn ang a, ni thum hnuah Finland an hmachhawn zui leh ang.