Pachhunga University College (PUC) chuan Library Week hmangin nimin khan a hawnna hun an hmang a, Mizoram University (MZU) vice chancellor Prof. Dibakar Chandra Deka chuan khuallian niin a hmanpui. Prof. Vanlalchhawna, MZU finance officer pawhin khualzahawm niin a telpui bawk.
Library Week hawnna hun hi he college Central Library-ah inkhawm tawite neia hman a ni a; hetah hian PUC Library-ah lehkhabu 63287 a awm mek thu leh nitin mi 437 velin tlawh ziah ang a nih thute report a ni. Inkhawm hi college vice principal Dr. MZ Khiangte-in a kaihhruai a, Dr. Lalthanmawii Sailo, assitant librarian-in report hi a pe a ni. Report-ah hian RFID (Radio-Frequency Identification) technology hmangin lehkhabu hawh leh pekir tur tan a thawktute tibuai lo a, khawl hmanga lakchhuah leh pekkir leh theih a nih thute, competitive exam atana ṭangkai tur bik lehkhabu dahkhawmna siam a nih thute, mitdel lehkhabu bik eng emaw zah dah a nih thute, AICS (Academy of Integrated Christian Studies) nen lehkhabu inhawhtawn theih tura thuthlung neih a nih thu leh e-resources (electronic resources) hrang hrang chhawr ṭangkai theih a nih thute tarlan a ni.
Principal Prof. H. Lalthanzara’n inlawmna thu a sawi a, khuallian Prof. Dibakar Chandra Deka chuan library pawimawhna leh hlutna a sawi a; khualzahawm Prof. Vanlalchhawna pawhin mihringa theihna awm tihhmasawn chu thildang zawng zawng aia pawimawh ber a nih thu leh chumi atana zirna in library ṭha a pawimawh thute a sawi.
PUC Library Week chhung hian PUC Seminar Hall-ah Book Fair & Display of Rare Collections neih tel a ni a, Prof. Dibakar Chandra Deka hian a hawng nghal a ni. Lehkhabu zuartu hrang hrangin lehkhabu an zawrh bakah MZU Central Library leh Mizoram State Archives ten lehkhabu leh thuziak hmuh tur awm zen zen lote en theih turin an chhawpchhuak a ni. Hei bakah hian October 9-ah Mizo ziaktu hriathlawh leh zirlaite inkawmna hun Meet the Authors neih a ni ang. Competition hrang hrang: painting, photography, reels making, bookmark design, badge/lapel pin design te Library Week pual hian huaihawt mek a ni bawk.
October 10-ah Library Week kharna hun hi hman a ni ang.