Kar tawpah English Premier League en tur a awm hi kar tawp tifamkimtu a ni a. Kar tawpah rau rau pawh Pathianni zanah inkhel hmuhnawm tura ngaih, inkhel ngaihven hlawh a awm fo thin. Pathianni zanah inkhel hmuhnawm tura ngaih a awm thin vangin ‘Super Sunday’ tih a ni hial thin. Kar liam ta Super Sunday-ah team lian an nep a, Manchester United, Chelsea leh Tottenham te an chak zo lo vek.
- United an chak thei lo
Season thara bul tan fuh lo Manchester United in chak an harsat chhunzawm a, Villa Park-a an khingpui Aston Villa nen goal awm lovin an inhnehtawk. Red Devils hi an khelh thum chhung an chak thei lo vek a, manager Erik ten Hag dinhmun a derthawng tulh tulh.
Chak mamawh United hian Aston Villa lakah an khel chhe lem lo viau a, goal thun theihna hun tha pawh an nei. Season thara goal thun harsat Marcus Rashford chuan goal thun theihna hun tha tum hnih a nei a, Villa keeper Emi Martinez a paltlang thei lo ve ve. United tan hian captain Bruno Fernandes chuan freekick atangin goal a thun teuh viau bawk a, vanneihthlak takin Villa an him hram. Bench atanga lut Antony pawhin goal thun theihna hun tha a nei ve bawk a, si nghak chetha tak Martinez a paltlang thei bik lo. Inkhel hmuhnawm takah goal lut a awm thei lo tluan a, Villa leh United te chu goal awm lovin an inhnehtawk.
Aston Villa an khelh hmain United hi Tottenham lakah 3-0 ngawtin an tlawm a. Europa League-ah hma taka goal hnih an thun chungin FC Porto lakah an chak zo lo leh a. Insiamthat an mamawhna inkhelah Aston Villa nen an inhnehtawk leh bawk. Villa lakah an chak zawh leh tak loh vangin United hi EPL season tharah vawi sarih khel tawhin vawi hnih chiah an chak a, tlawm zawkah vawi thum zet tang tawhin, draw vawi hnih an nei bawk. Khelh 7 atanga point 8 hmuin United hian 14-na an luah mek a. Hmahruaitu Liverpool nen an inkarah point 10 zet a tla zep tawh.
United an talbuai lai hian Aston Villa erawh season tharah an khel tha chho viau. Villa hian EPL-ah vawi 7 khel tawhin point 14 an hmu a, panganaah an awm mek. Champions League lamah pawh bul an tan tha viau a, vawi hnih an chak zawn tawhin paruknaah an awm mek bawk.
Aston Villa lakah an chak zawh loh vangin United manager Erik ten Hag hma lam hun a thim leh zual. Tottenham lakah an mualpho hnu khan mi tam tak chuan Ten Hag hi United in an ban nghal mai an ring a. Beisei ang chanchin thar erawh a awm lo. Kar laihawlah FC Porto an hmachhawn dawn bakah kar tawpah Aston Villa hmachhawn leh tur an ni a, inkhel an hmachhawn zawn vangin an ban rih lo ni maia ngaih a ni. United in inkhel an hmachhawn lova an awl lai, international break-ah Ten Hag hi an ban tura ngaih a ni a. International break a lo thleng ta a, Ten Hag hma lam hun tur a chian theih thuai a rinawm.
- Chelsea an chak zo lo
Season hnih chhung sum seng hnem chunga beisei phak tawh lo Chelsea an insiamtha a, season tharah an khel tha chho ta viau. Table-ah palina luah mektu Chelsea hian Pathianni zan khan Stamford Bridge-ah Nottingham Forrest an mikhual a, an mualah tam zawk ni chungin an chak zo lo.
Stamford Bridge-ah season thara khel tha pahnih Chelsea leh Nottingham Forrest te an inhnehtawk viau a, chawlhlawk hmain goal thun thei an awm lo. Chawlhlawk hmain goal lut thei lo mah se chawlhlawk hnu lamah erawh goal a lut ta thuai thung. Second half tan atanga minute lina lekah Chris Wood chuan Nottingham Forrest hmahruaina goal a thun. Wood goal hian Chelsea a cho phur a, an khel tha ta sawt thung a, goal pawh an thun thuai.
An si phurh sut tuma tan khawh nasa tak Chelsea tan hian Noni Madueke chuan minute 57-naah goal thunin an si phurh a sut. Goal khat ve ve an thun hnuin inkhel a hmuhnawm zui viau a, inkhel boruak pawh a tang tha viau bawk. Boruak lum tak karah Nottingham Forrest player James Ward-Prowse chu minute 78-naah hnawhchhuah a ni. An mualah tam zawk an nih vangin Blues hian chak tumin tan an khawh nasa viau a, hlauhawm siam thin mah se goal an thun thei tawh bik lova, an mualah uiawm takin an chak zo ta lo a ni.
- Brighton in Spurs an lehthal
Pathianni zana inkhel dangah Brighton & Hove Albion chuan an mikhual Tottenham Hotspurs lakah si hnih an phur hmasa zet chungin hnehna an chang let a, point thum hlu tak an hmu.
EPL-ah United an sawp vang leh European competition lama an khelh that vanga phur tak Tottenham hian Brighton mual American Express Stadium-ah bul an tan tha viau a, chawlhlawk hmain goal hnih an thun hman. Tottenham tan hian Brennan Johnson chuan minute 23-na lekah hmahruaina goal a thun a. Chawlhlawk dawn hnaih minute 37-naah James Maddison chuan an goal hnihna a htun zui leh a, si hnih faia hmahruai chungin chawlhlawk an hmang a, an dinhmun a tha hman hle.
Chawlhlawk hmain goal hnih chhuah mah se Brighton in chawlhlawk an hmang tangkai a, chawlhlawk hnu lamah goal thum ngawt an thun. Second half tan atanga minute thumna lekah club leh ram tana khel tha chho tak Yankuba Minteh chuan goal thunin an si phurh a sut a. M<inute 58-naah Georginio Rutter chuan goal thun belhin an si phurh a sut. Inhnaihchilh taka goal hnih an thun vangin Brighton an phur a, an inringtawk ta viau bawk. Inringtawk tak chunga inlan Brighton tan hian Danny Welbeck chuan minute 66-naah hma an hruai letna goal a thun a, Welbeck goal hmang hian hnehna changin point thum hlu tak an hmu zui ta a ni.
Tottenham laka point thum hlu tak hmu Brighton hian khelh 7 atanga point 12 hmuin parukna an luah a. Khelh 7 atanga point 10 hmun Tottenham hi pakuanaah an awm ve thung.