Nimin chawhnu khan Central YMA Committee Room-a NGO Co-Ordination Committee thukhawmin, Myanmar rama Zo hnahthlak unaute inkara harsatna awm chungchang, Manipur-a Zo hnahthlakte thawhhona chungchang leh Mizoram sawrkar-in tunhnaia Oil man a tih san chungchangte an ngaihtuah a. A hnuai a mi ang hian thuchhuah an siam.
- Myanmar-a Zo hnahthlak awm ten inunauna tha leh zual an neih theih nan pawl hrang hrang hruaitute kawm ni se. Inlungrualna tha tak an neih theih nan kawng zawnpui ni se.
- Manipur-a Zo hnahthlak hnam hrang hrangte inphuarkhawmna tura pawl din Zo United kal zel dan tur chungchang ngaihtuahin hun remchang hmasa berah Zo United hruaitute kawm ni se.
- Mizoram sawrkar thuchhuah Notification No. J.19001/2/2020-TAX dated 30th August, 2024-in a sawi anga, Mizoram chhunga Petrol leh Diesel hralhchhuah atanga chhiah a tihpun chu a punna a san lutuk avang leh Mizoram mipuite tan phurrit lian tak a nih avangin, Mizoram sawrkar-ah tihniam leh tura ngenna siam ni se, he kan hmalakna kalpui a nih chhung chuan eng pawl mahin mipuite nghawng thei zawnga hma la rih lo turin NGO Co-Ordination Committee chuan a ngen a ni.