Nimin khan PWD Minister Vanlalhlana chuan NH-06 huam chhûnga Khamrang to Kawnpui kawng siam mêk chu a hmunah a tlawh leh. PWD Minister chuan kawng siam chu chak taka kalpui tur leh hetih rual hian mipuite harsatna thlen lo thei ang bera hna thawk turin thawktute a fuih a, ‘NH-06 Kawnpui to Khamrâng chu Mizoram mamawh lâkluhna hnukpui a nih avângin a chhe rei thiang lo a, chak taka siam a ṭul a ni’, a ti.
Vanlalhlana chuan, ‘Contract hna reng reng, kawng siam a ni emaw thil dangah pawh dawngdah taka hna thawk thinte sawrkârin a dim dawn lo a, Mizoram State Project Monitoring Committee-te mit tlung lova hna thawkte chu an phu tawka an chung thu ngaihtuah a ni zel dawn a ni’ tiin, ‘Mizoram sawrkar chu kal phung thar sawrkâr anih tawh avangin NH-06 pawh tun hma ang mai maia dawngdaha enkawl a rem tawh lo a ni,’ a ti a.
“Tun dinhmunah NH-6 hi duhthusamin siam hlei thei lo mah ila, lirthei engpawh kal theiin enkawl chhunzawm mek a ni a, kan chak lakna kawng ber a nih avangin englaipawha lirthei kaltlang theiha enkawl chhunzawm zel hi sorkar chuan kan tum tlat a ni,” a ti. Kuminah Mizoramin fur a tawrh nasat thu leh ruah tui tlak chhung a rei thu sawiin, ‘Tunah hian Aizawl khawpui hmun hrang hrangah kawng chhe zual thawm ṭhat mek a ni a, ruah tui tla tam han ziaawm se a aia ṭha lehzuala kawng thawm ṭhata siam a ni zel dawn a ni’ a ti bawk.
Kawngpui siam tlawhnaah hian Minister hi Er.H.Ginzalala MLA, Adviser to C.M (Technical) leh K.C Lianmawia, General Secretary, ZPM General Headquarters bakah H.Zoramliana C.E (Highway, PWD) te’n an tawiawm a ni.