Pathianni tlai khan Sanghai Master final khelh a ni a, inkhel hmuhnawm takah Jannik Sinner chuan set hloh lova Djokovic hnehin a champion. Sinner hian Title 100 lak tlin tum Djokovic kawng a dal.
Final ah Title 100 lak tlin tum Novak Djokovic leh tunlaia player tha ber Jannik Sinner te inhmachhawn hian ngaihven a hlawh hle. Final ngaihven hlawh takah Sinner leh Djokovic te hian hmuhnawm takin bul an tan a, set khatnaah tie-break khelh a ngai nghal pang. Game an inlakchhawk zak zak a, break an neih theih loh hnuin tie-break khelh a ni. Tie-break ah hian Sinner-a’n bul a tan tha viau a, 4-0 ngawtin hma a hruai hman. Serbian pa huaisen Djokovic-a’n point li hmu hman mah se Italian a chungnung a, set khatna a la.
Harsa taka set a lak hnuin set hnihnaah Sinner a khel tha leh zual a, Djokovic-a’n a chai hleithei tawh meuh lo. Set hnihna tir lamah Sinner hian awlsam takin a khingpui a break a, 4-1 in hma a hruai. Djokovic hian break let ngei tumin tan khawh thin mah se thahrui ngah leh ball vaw na tak Sinner a dang zo lova, hreh tak chungin tlawm zawkah a tang ta nge nge a. World No. 1 ni chunga kum khar tur Sinner hian 7-6 (6-4), 6-3 a hnehna changin a champion zui ta a ni.
Grand Slam leh ATP Final a champion ngun ber, World No 1 ni rei ber (Weeks & Year end) ni tel bawk Novak Djokovic hian Title 99 a la tling tawh a, title 100 lak tlin tumin hma lam a pan mek. Shanghai Master-ah champion in title 100 la tling thei huanga intahluh tum mah se Sinner a paltlang zo ta a lo a ni. Tennis player zingah title 100 la tling thei pahnih chiah an awm a, chungte chu Jimmy Connors (109) leh Roger Federer (103) te an ni. Final-a Sinner leh Djokovic te inkhel hi Roger Federrer chuan a hmunah a en nghe nghe.