UEFA Nations League khelh mekah zirtawp zan khan team lian Netherlands in hnehna an chang zo lo. Netherlands an chak zawh loh lai hian Germany chuan mikhual an nihna hmunah hnehna an chang ve thung.
Nations League season tharah tlawm la nei lo Netherlands hi Hungary hmachhawn turin Puskás Aréna-ah an lenglut. An len luhna mualah si an phurh hnuin an defender pawimawh Virgil van Dijk hnawhchhuah a ni. Si phur zawk leh tlem zawk an nih vangin tlawm ngei tura ngaih ni mah se hun tawp dawn hnaihah an si phurh an sut a, tlawm an pumpelh thei tlat thung.
League A, Group 3-ah point khat chiah la hmu Hungary hian an group a hmahruaitu Netherlands lakah bul an tan tha a, goal thun hmasa zawkah an tang. Hungary tan hian Roland Sallai chuan minute 32-nah hmahruaina goal a thun. Sallai goal thun hmang hian hun rei tak chhung hma an hruai. Hma an hruai reng hnuin Netherlands tlar hnung ban rinawm Virgil van Dijk chu minute 79-naah hnawhchhuah a ni. Van Dijk hnawhchhuah a nih vangin Netherlands dinhmun a chhe leh zual a, Hangary an phur phah viau thung.
Si phur zawk leh tlem zawk ni mah se Netherlands in team huaisen an nihzia an lantir a, huai takin an khingpuite an hmachhawn. Netherlands tan hian Denzel Dumfries chuan hun tawp dawn hnaih minute 83-naah goal thunin an si phurh a sut. Goal thun tumin team pahnihten tan khawh nasa viau mah se hun tawp thlengin goal dang a luh belh thei tawh lova, Hungary leh Netherlands te chu 1-1 in an inhnehtawk zui ta a ni.
Zirtawp zana inkhel dangah Germany chu Bosnia and Herzegovina hmachhawn turin Bilino Polje-ah an lenglut a, Deniz Undav goal hnih thun hmanga hnehna changin point thum an hmu. Bosnia hnehtu Germany hian an chunga awm Netherlands an lehpel a, Group 3 hmahruaitu thar an ni.
Bilino Polje a lenglut Germany hian bul an tan tha a, chawlhlawk hmain goal hnih an thun hman. Inkhel tan atanga minute 30-naah Deniz Undav chuan hmahruaina goal a thun a. Hmahruaina goal a thun atanga minute ruk hnu lekah Undav hian an goal hnihna a thun zui leh nghal zat a. A goal hnih thun hmang hian hun rei tak chhung si hnih faiin hma an hurai.
An mikhual te lehthal tumin Bosnia hian chawlhlawk hnu lamah tan an khawh nasa hle. Bosnia tan hian senior player Edin Dzeko chuan minute 70-naah goal thunin an si phurh a sut then. Dzeko goal thun vangin inrintawkna sang tak nen inlan zui bawk mah se hun tawp thlengin goal dang an thun belh thei tawh lova, an mikhual Germany lakah uiawm takin an tlawm zui ta a ni.
League A, Group 3 a mi ten vawi thum theuh an khel tawh a, point 7 hmutu Germany in hma an hruai mek. Germany hnuai chiahah hian Hungary laka chak zo lo Netherlands chu point 5 hmuin an awm a. Bosnia leh Hungary ten point khat ve ve an hmu tawh bawk.