Inrinni zan khan UEFA Nations League 2024-25 khelh chhunzawm a ni a, League A, Group 1 hmahruaitu Portugal chuan Poland an hneh a, season tharah an la chak vek. Portugal tan hian Cristiano Ronaldo chuan goal khat a thun a. Portugal leh Cristiano Ronaldo dang thei an la awm lo. Group 1-a inkhel dangah Crotia in hnehna an chang ve bawk.
Portugal hi Poland hmachhawn turin Warsaw-ah an zin a, PGE Narodowy-ah an lenglut. An lenluhna mualah an khel tha viau a, chawlhlawk hmain goal hnih an thun hman. Portugal tan hian Bernardo Silva chuan minute 26-naah hmahruaina goal a thun. Hma taka goal an thun hnuin an khel tha chhunzawm viau a, chawlhlawk hmain goal dang an thun belh leh hman. Chawlhlawk dawn hnaih minute 37-naah goal 1000 thun tlin tuma hma lam pan mek Cristiano Ronaldo chuan Portugal goal hnihna a thun a, Roberto Martínez
team te hian si hnih faia hmahruai chungin chawlhlawk an hmang.
Chawlhlawk hnu lamah Portugal an khel tha chhunzawm a, goal khat an thun belh leh. An si phurh sut ngei tuma tan khawh Poland tan Piotr Zielinski chuan minute 78-naah goal thunin an si phurh a sut then. He goal hian mualneitu fuih phur viau mah se Portugal a chhaihkawlh tel tlat thung. Portugal hian na taka an khingpuite an nawr an hlawkpui a, hun tawp dawn hnaih minute 88-naah Poland player Jan Bednarek chuan an lamah ti goal in, Portugal goal thumna a thunsak. Bednarek goal thun hnu hian goal dang a luh belh tawh lova, Portugal chuan 3-1 in hnehna an chang zui ta a ni.
Portugal an chak rual hian Group 1-a inkhel dangah Croatia chuan an mikhual Scotland an hneh a, hmahruaitu Portugal kal fal lutuk tur an um chhunzawm zel.
Maksimir khelmualah Croatia in bul an tan tha lova, an mikhual lakah goal an chhuah hmasa. Inkhel tan atanga minute 32-naah Ryan Christie chuan mikhual team Scotland hmahruaina goal a thun. Ryan Christie – goal thun hian mualneitu muhil a kai harh a, goal hmangin an mikhualte an chhanglet nghal thuai. Goal an chhuah atanga minute li hnu lekah Igor Matanovic chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Croatia an khel tha chhunzawm a, hun tawp dawn hnaih lamah goal an thun leh ta nge nge. Minute 70-naah Andrej Kramaric chuan hma an hruai letna goal a thun. He goal hi Scotland in hun tawp thlengin an sut thei tawh lova, Croatia lakah an tlawm zui ta a ni.
Group 1-ah hian khelh thum atanga point 9 hmutu Portugal in hma an hruai chhunzawm zel a. Vawi hnih chak tawh Portugal in point ruk hmuin an dawt a, Poland in point thum an hmuh tawh laiin table mawngphaha awm Scotland in point an la hmu ve lo thung.