Nimin khan ZPM party chuan an party office-ah chhung inkhawm neiin, he huna thu tawi sawitu Lalliansawta, ZPM President chuan, tun hnaia Assam Rifles Biak In, party office atâna chhuh sak tuma mi thenkhatin ZPM party an puhna chungchâng sawiin, “Party office hmun tur atan Assam Rifles Biak In hi a sawi pawh kan sawi ri ngai lo a, kan inrawlh lo a ni, kan inrawlh ang zawnga thu tithangtu, mipui hruai kawi tumtute hian ZPM party chungah ngaihdam dil ngei rawh se”, a ti.
Lalliansawta chuan, “Sorkarna kan han chang a, Party Office nei lo ta chu, Party Office neih a tul thu kan sawi fo a, kan hotute rilruah hual sa leh biak mek pawh kan nei a ni, Assam Rifles Biak In saw, kan sawi ri ngai lo hrim hrim a ni. Hei hi Zoram mipui hian min hriatpui se ka duh a ni. Assam Rifles te hi lo insawn chhuak dawn ta pawh nise, saw lai aia hmun tha leh remchang zawk hmun tam tak beisei tur a awm ngei ang. Chutiang pawh ni si lova mi rilru hruai kawi tuma thenkhatten hetianga politics a in beih nan an hmang duh mai hi a pawi hle ani, tunlai khawvel changkang tawhah dawt chu awlsam taka laihlan leh mai theih a ni tawh avangin dawt sawi hi a tlo lo lehzual a ni” a ti a.
Hetiang zawnga politics khelh hi ram hlui zia dik tak a nih thu sawiin, ram hlui zia hmanga politics khelh hi mipuiin an kham tawh thu a sawi bawk.