Nimina Hnam Run chhung inkhawma thusawitu MLA Robert Romawia Royte, MNYF President chuan ZPM sorkarin Mizo hnam issue pawimawh tak tak a ngaihthah chu pawi a tih thu a sawi a.Mizoram leh Myanmar inkara zalen taka inkalpawh phalna Free Movement Regime(FMR) hlih chungchangte, Myanmar ramri hung chungchangte, thenawm ram leh state atanga Mizo raltlan ngaihven chungchangah te, Assam nena ramri chungchangah te Sorkar anga Mizo hnam humhalh a tul em em laiin ZPM Sorkar hian mipui beisei angin hma ala lova. CM zahawm takin vairam media thleng thleng a dawih aw a chhuah hi a pawi tak zet a ni, a ti.
Mizo khaw hlun tak Phuldungsei khuaa Mi 85 te Mizoram ration card atanga ZPM Sorkar in a paihchhuak phei hi chu a serious takzet a. Heng Phuldungsei khuaa India ram dan anga an Ration Card leh Adhaar card Online a link vek tawh a ni, sorkar hian an Adhaar Card nen an Ration Card nen Online in zawm leh vat turin kan phut a ni, a ti a.
MLA leh MNYF President Robert Romawia chuan tunlaiin dawt leh thudik famkimlo a lengvel nasa a, thudik puanzar tam a tul tak zet a ni a ti a. Assembly Session a MLA te zawhna Ministers ten an chhanna te chhiar chhuakin MLA Roberta chuan C.Lalsawivunga Minister chhanna chhiar chhuakin PMJVK atan vaibelchhe Rs 2186.77 lai Central sorkarah projects thehluh a ni a, Sports Deptt leh ICT Deptt chauhvin sum vbc 420 vel hmuh a ni. SASCI chungchanga zawhna pawh Vanlalhlana PWD Minister in SASCI hnuaiah dan dik lova hna inpek a awm lo tiin a chhang a ti bawk.
Robert Romawia Royte chuan Sinlung Hills Council(SHC) election lo awm turah MNF Party in candidate tha tak tak kan neih avang leh ZPM sorkar chetdanin mipui beisei a phakloh avangin Pathian zarah MNF tan sorkar siam ngei a beiseiawm tihsawiin SHC mipuite chu MNF vote vek turin a sawm bawk.
Hnam Run chhung inkhawm hi C. Lalhmingsanga, General Secretary MNYF Headquarters in kaihruai a ni.