Hun eng emaw chen Zo rimawi khawvelah an music video tharte kan hmuh tawh loh hnuah, Mizo band ropui ber zing a mi — Albatross — chuan kumin Krismas chu hla mawi tak hmangin chibai min buk an tum e.
Albatross band hian Krismas hla an buaipui mek a. An hla thar tur hi ‘Ram Ropui Angel-te U’ tih a ni. He hla hi sap hla ‘Angels We Have Heard On High’ atanga leh lin a ni.
An Krismas hla thar tura music arrangement zawng zawng hi Mizorama recording studio kan neih changtlung ber pawl, Kings & Prophets Studio-ah buaipui vek a ni.
An hla thar tur chungchangah Albatross vocalist Rintea chuan, “Kan Krismas hla thar tur hi kan hriat lar chu a ni na’ngin, a music arrangement vel hi danglam deuhin, music thar chhawpchhuah tumin theihtawp kan chhuah ve a ni. Kan bassist MS-a te, kan drummer David Ralte te an la fit em em a, kan guitarist Hmingpuia lah a that ngaiin a la tha reng. Mahse, tun tumah hian keyboard ri kan telh ve dawn lo a. Kan keyboardist PB Lianhminga kuthnu a tel ve thei dawn ta lo chu a lunglenthlak kan ti khawp mai,” tiin THALAI TIMES a hrilh.
Mizo musician zinga music track siam a rimawi khawvela pa hriat hlawh ber pawl, Albatross keyboardist PB Lianhminga hian kum la naupang takin May 3, 2023 khan chatuan ram a pan a. April 5, 2024 zan khan, Dawrpui Multipurpose Centre-ah a tribute concert pawh hlawhtling taka neih a nih kha.
Albatross hian member kima mipui hmaa an perform hnuhnung ber chu kum 2016-a Coffee Night-a an zai kha a ni.
Albatross hian kum 2001 khan an debut album, self title ‘Albatross’ tih chu an tlangzarh a. He album-a track list zingah – A Dam Ngei Ang, Beisei Bo Hnu, I Tello Chuan, Vanglai Nun, A Tlai Em E, Chungmu Vanlai tihte kha khang hun laia hla lar ber ber te an ni. Tun thlengin an hlate pawhin cover a hlawh hle.