Bangladesh atanga sahimna zawnga Mizorama raltlante chu hmun khata awm khawm tur hmalak mek a ni.
Adviser to Chief Minister Lalmuanpuia Punte chuan Bangladesh atanga raltlan awm mekte dinhmun enfiah leh zirchiang turin Lawngtlai tlawhin, Ningani khan Lawngtlai district bawrhsap leh official-te chu DC Conference Hall-ah an thukhawm.
Thusawiin Lalmuanpuia Punte chuan raltlanten awmna tur atan a an duh duhna hmun an thlang emaw, hmun hrang hranga an kal kual thin chu thil fel lo tak a nih avangin, mumal zawka inkaihhruaina siam a tul tih a sawi a. Raltlan enkawl kawngah hmun khata awmkhawm an nih chuan sorkar tan pawh hmalak a awlsam dawn tih sawiin, hmun khata awm khawm tura hmalak mek a nih thu a sawi.
Bangladesh atanga raltlante chu hmun li – Parva, Damdep-II, Cherluitlang leh Saizawh W-ah sawn khawm tura ruahmanna siam mek a nih thu te, heng khaw pali zirchiang tur hian Study Team-ten Nilaini khan an tlawh vek tawh thu te, khawtlang hruaitute pawh sawipui tawh an nih bakah, Study Team-te hian an thil zirchian leh enfiahte chu sorkar ‘High Level Committee on Bangladesh Refugees’-ah an thlen leh tur thu adviser to CM hian a sawi bawk.
Thutkhawm kaihruaitu Cheemala Siva Gopal Reddy chuan raltlante enkawl kawngah theihtawp chhuah a nih thu sawiin, tunah hian raltlante tan buhfai sem mek an nih thu leh Myanmar, Bangladesh leh Manipur atanga raltlante chhawmdawl kawngah sorkar laipui leh Mizoram sorkar duh dan leh thupek ang a hmalak zel a nih tur thu a sawi bawk.
He huna tar lan a nih danin Lawngtlaiah hian tun dinhmunah raltlan Myanmar 6,030, Bangladesh 2,014 bakah Manipur atangin IDP – 84 an awm mek thu a sawi.
Thutkhawmah hian Lokeshwaran R., SP, Zoramsiama Hmar, Addl. DC, Margaret J. Vanlalremmawii, SDO (S), C. Lalfakmawia, OSD- Home Department, Line Department aiawh leh President, Mizoram Bawm Students’ Association (MBSA) te an tel a ni.