Lunglei District Bawrhsap R. Lalthazuala hovin nimin khan Lunglei khawpui helna kawng (bypass road) sial tura ruahmanna sawi ho a ni.
Lunglei DC Conference Hall-a sawihona neihah Lunglei Bawrhsap chuan, NHIDCL leh PWD lam atangin a kal khan tha deuh nia ngaihte pawh lo riruat lawk tawh ni mah se, kawng kalna tur thlan fel hnuah DPR siam a, Ministry of Road Transport & Highways (MoRTH)-ah pawmpui tura theh luh theih chauh tur a la nih thu sawiin, a kawng la thui viau mah se, a pawimawh lai ber a nih avangin kal khawmte chu Lunglei khawpui tana tha ber tura ngaihtuahna seng tlang a, ruahmanna siam turin a chah.
Lunglei bypass road atana NHIDCL lamin kawng kalna tur (alignment) an ruahman chhin pali leh PWD lam atanga ruahman chhin pahnih chu thlir ho a ni. Lunglei khawpui chhung lirthei tlan tihzangkhai dan tur te, mipui tana awlsam, zangkhai leh mipuiin an chhawr theih dan tur te, ei leh bara hmasawnpui theih tur te, leilung leh chhehvel tana him tur te, ram lak leh kawng siamna senso tur leh nghawng a neih tur hrang hrangte thlir chungin rawtna hrang hrangte hi sawi ho a ni.
NHIDCL option pahnih milin, PWD lam leh kal khawm member-ten rawtna an neih hrang hrang rin lut telin, Detailed Project Report (DPR) chu ruahman ni se, tih a ni a. Kawng tha leh tlo a awm theih nan leivung paihna tur leh leilung tana him tur ngaihtuah lawka ruahmanna siam tum ni se, an ti bawk.
Kawng kal dan tur riruang duan lawk dan chuan, Lunglei bypass road hi Tlawng lei chhak, Saza Bangla chhak deuhah kawng pangngai atanga pengin, tlak lam zai zaiah fual deuh hlekin Lunglei khawpui a hel ang a, Sazaikawn kawng peng thuam laiah a chhuak phei dawn a. A pen tanna atanga a tawp thleng hian km 21.55 vela thui ni tura ngaih a ni.
Sawihonaah hian Lunglei North bialtu MLA aiawhte, Lunglei Municipal Council (LMC)-a Ward No. I Councillor Lalhruaitluangi Sailo te, sorkar department hrang hrang official-te, NHIDCL te, District MJA, Joint Local Council leh Sub-Headquarters YMA president theuhte, Pukpui, Zotlang, Rahsiveng leh Sazaikawn local council chairman-te leh YMA president-te an tel a ni.