Aizawl: Animal Welfare Board of India (AWBI) aiawh Dr. RB Chaudhary chuan November 17-20, 2024 chhung khan Mizoram a rawn tlawh.
Dr. Chaudhary hian a cham chhung hian AH & Vety. Department Director Dr. R. Zothanmawii leh nodal officer-te hmuin Animal Welfare Board of India din chhan leh hmalak an tum dante a sawipui a. JB Foundation din, Animal Rescue Centre, Bungbangla pawh tlawhin a dintute – Ramzirsangi leh Lalrokimi Pautu ten lo dawngsawngin an fan kualpui bakah hmalak dante an lo hrilhfiah.
Animal Rescue Centre, Bungbangla-ah hian tun dinhmunah ui 40, kel pakhat, zawng pakhat leh zawhte 12 enkawl mek an ni a. Ran enkawl chhunzawm theih lohte, tihduhdahna tuar enkawl tura lakte leh neitu awm lo khawlaia chharte chu he hmunah hian enkawl an ni a. A enkawlna senso hi mi tlawmngai, ran hmangaihtute sum thawhkhawm tlingkhawm atanga ruahman a ni deuh ber.
AWBI aiawh hian JB Paws Hospital, Thuampui, Aizawl pawh tlawhin thawktute a kawm a. AMC Commissioner Joseph H. Lalramsanga pawh hmuin animal welfare chungchanga hmalak theihna turte leh mawhphurhna chungchang a sawipui.
Dr. Chaudhury hian animal welfare chungchangah north east state hrang hrangte a tlawh mek zel a. Mizorama a cham chhung hian AH & Vety. Department atangin Dr. Lalfamkima, Deputy Director (VE&E) leh Dr. C. Neihthangpuii, Deputy Director (VPH) ten an tawiawm a ni.