Aizawl: Champhaia Govt. Gandhi Memorial High School-in kum 75 a tlin, platinum jubilee a lawmna pui ber nimina neihah Home Minister K Sapdanga’n khuallian niin a hmanpui.
Sikul tuala jubilee lawmna inkhawma khuallian K Sapdanga chuan thu sawiin, he sikul atang hian mi chhuanawm tak tak leh mi hmasa – IAS, IPS, engineer leh a dangte an lo chhuak tawh thin tih a sawi a. GM High School chhuakte chu Mizoram pum titi leh hriat hlawh an ni thin tih pawh sawiin, vawiina (nimin) zirlai kalkhawmte chu mi hmasate sulhnu chhuia ram pum tana mi chhenfakawm nih tum turin a chah.
DP&AR minister ni bawk, K. Sapdanga chuan Mizoramin All India leh Central Service Regular Recruit/ Direct Recruit a nei tlem tial tial a, a neih chhunte pawh chân vek theih a nih loh thu a sawi a. “Mizoram district hrang hrangah Mizo ngei DC leh SP dah duh thin mah ila, kan indaih miau loh avangin hnam dang dah a tul a ni,” tiin zirlaite chu he lam kawnga an ngaihtuahnate seng turin a fuih bawk.
Hlawhtling tur chuan mi hlawhtlingte zir anga zir mai hi a kawng awlsam tak a nih thu sawiin K Sapdanga chuan, tun atanga kum 19-ah chuan GM High School a lo zir tawhte hi Mizoram puma a thiam ber ber ni thei se a duh thu sawiin, zirlaite chu tun atanga tan la a, zirna kawngah theihtawp chhuah turin a chah a ni.
GM HS Platinum Jubilee lawmna pui berah hian khuallian K Sapdanga hian R Khawbula (L) leh Rohmingthanga (L), headmaster lo ni tawhte hriatrengna chawlhbuk a hawng nghal a. Er Hrangthanga Zote, CE, PWD (ex student)-in souvenir a tlangzarh bawk.