Aizawl: Mizorama Smart Metering Project thawktu tur Contractor/Advance Metering Infrastructure Service Provider (AMISP) leh P&E Department chuan F Rodingliana, Power Minister Office Chamber-ah nimin khan inremna (agreement) an ziak.
Sorkar laipui, Ministry of Power hmalaknain India ram pumah electric power distribution tihchangtlunna tur Revamped Distribution Sector Scheme (RDSS) hnuaiah Smart Metering Project hi thawk tur niin, India state tam zawkah kalpui tawh chu Mizoramah hnathawh bul tan a ni ve dawn ta a ni.
Smart metering hi pre-paid mode a kalpui tur a ni a, a hna hi TOTEX mode a thawh tur a ni ang a. A awmzia chu contractor/Advance Metering Infrastructure Service Provider (AMISP)-ten anmahni sum sengin engkim an thawk vek ang a, meter a tha chiang ngei (go-live) tih a chian atanga thla khatna atangin consumer-te smart meter service charge hi department-ah thla 93 chhung bill an submit ve thung ang. Sorkar laipui hian meter man (benchmark price) atanga zaa 22.5 a tumsak dawn avangin thla tina AMISP-in an bill tur hi a su hek nual ang.
He hna (AMISP) thawktu tur thlanna hi e-tender tihchhuah niin, open competitive bidding hmanga thlan a ni a, tuna contractor thlan takte hi ni October 14, 2024-ah Letter of Award pek a ni a, nimin (21.11.2024)-ah contract agreement sign a ni ta a ni.
Smart meter installation hna hi Letter of Award pek atanga thla 27 chhunga zawh tur a ni a, an zawh atanga thla 93 chhung an enkawl zui tura tih a ni.
He contract agreement ziah takah hian Mizoram a consumer 2,89,383 te, distribution transformer (DT) 2,300-a leh 11kV Feeder 398 atana tana Pre-paid Smart meter vuahsakte a keng tel a ni.