- CVL Fakhlamawia
He ka nun hi a ngui a, a khawhar fo thin. Hnemtu nei lo hian a vanruai a, ruak huau chunghian a tawt em em thin si a nih hi. Khawharna hian a thlahthlam ngai lo va, lunglenna hian a phatsan ngai hek lo. Hmun lunlai berah a maltlat a, hmun khawhar leh reh takah zalenna a nei fo. Suangtuahnahi a chakna a ni a, beiseina nen hmalam pan turin ke a pen ve fo thin a ni.
Beiseina pawh nei thei tawh lo khawp a mite’n tluchhe tawh ni a an rin laiin, beiseina nei turin a thinlungah eng de set set awmin a la hre tlat a, ngawirenga hmalam pan a, dipdaltu awm lova mahni a kal duhchang a nei fo thin! Puipun leh huau huau hnuchhawn a, ramdai a thing leh mau, kawr tuifim luang ri ker ker kara nun hmanhi nuam a ti fo a, a vak chhuak leh mai thin a ni. Tlang leh mual a thlir a, a nun khua a har a, a lungleng a, hnemtu nei lo mahse a vui lo; hnem chi a ni lo. A khawharna hi, a lunglen hnemtu ani a, a lunglen tawh chuan a chhungril nun a hlim tlat thung lawi si! |ahnain a kal kan bik erawh ani lo.
Khawvel mite’n an beisei ang sum leh hausakna hi a thlir tehchiam lo a, nun khawchhuah nan erawh taimak chhuah hram a duh a, dawngdah erawh a tum bik chuang lo. Leiah rochun leh khawm tur a neilo tih a hriat avangin hnutchhiah leh tur pawh neiin a in hre chuang lo. Hahdam tak a nuna, thihna kutvawt piah lama thlamuang taka chawlh chu a beisei ber a ni tawp mai a ni.
He hringnunah hian chhuan tur a nei lo va, chapo puitur a nei hek lo. Nunna chu Pathian kut a ni tih a hria a, chu Pathian kutah chuan a innghat tawp mai a ni. Beiseina eng lianpui a neih chu, sum leh pai, ro thil, a ni ve lo a, tangka leh rangkachaka chei chi pawh a ni hek lo, Nunkhaw nawmna a ni tawp mai a ni. Chutah chuan zalenna a awm a, itsika a awm ve lo. Elrel leh sawisel a awm ve hek lo a, inpawngneknain hmun a chang hek lo. Chu hmun chu khawiah nge a awm erawh a hre bik si lo! A zawng reng a ni.
Suangtuahnain hmanlai a thlir a, a lung a leng a, a hriat phakloh nunin a thinlung a luh chilh a, a ngaihtuahna hmangin kum sul sang liamah a let a, a bo tulh tulh a, a chhungril nun a fiah tulh tulh thung, hei lei tan hian finvarna tur ziah chhuah tur erawh a la ngaihtuah chhuak chuang rih lo!
Ropuina leh chawimawina a beisei ve lo, hun chu a ta a ni tih a hria a, a hun chu amahin a hmang mai a ni. Hla tak a thlir a beiseina nen a um a, tluk leh tlak, chhuih leh bah a fawm a, a kawng chu bumboh mahse; a phun ngai lo! Mipui phu mur mur zingah amah chauh chu ‘Mi nung’ a ni!
A hnim ruih a, a ngui nghiai a, mang ramah cheng nite’n a in hre rum rum thin, mahse; a rilru chu thlasik tukchhuak ang varin a fim lawi si! Tlang, phulrei nuam takah kal a fo a chutah chuan zalenna a awm a beisei fo, lungrualna tlang pawh a ni fawm. Lung tohlawt, inchherchhuan chungah chuan thuin a suangtuahna a kawm fo a, a zeldinna a tinung thin. Phairuam chung ngaw bawh vel a chhumrang kal delh delh te chu a thlir ning thei ngai lo. Chung boruak thiang takte chuan nunna thaw an pe in, chakna an siam sak awl lo niin a hre tlat thin. Mute (Sava) lo thlawk dir nget nget te chu atan nun ti nuamtu an ni a, a thawa chakna pe tu an ni. Sava hramte chuan a thluak an chawm lian a, rannung bawkvaka kalte chuan a tha an ti chak thin a, chi chuan Pathianhi a awm a ni tih a hriatchhuah tir fo \hin.
Luite tui fim, luang ri her her chuan a beng a fah fo a, rimawi tum thiam te angin hla mawi tak an sak sak fo thin, thli thawin hnim hnah a chhem rik hlep hlepte chuan rimawi an rem a, vanrang chhum ngawi reng a lo leng delh delh te pawh khian thluk mawi tak neiin a hre fo thin. Ngaw kar thing leh hruizam lo par te chu a thlir ning ngai lo. Par zu tlan Khuai leh Phengphehlepte chuan hlamawi tak sa in a hria a, a chhungrilah rimawi an tum sak fo thin a ni.
Sava lo hram ri chel chulte chu a pawlte an ni a, a nun tihlimtu leh a suangtuahna ti nungtu an ni reng thin. Thinghnahsin a ngainat ang bawkin, a hnah hrawte chu a hmuh hmaih mai ngai lo a, an mawina bawmtu nungchate pawh a thlir ning ngai hek lo.
KHAWPUIAH :
Khawpui chu khawl ri rum rum leh thir chher riin a khat a, boruak thiang hip tur reng a awm ve lo. Khua chu a uap churh a, mipui tam tak chu an ngui nghiai a ni.
In chhawng sang tak tak a, mifing tak takte, office room ropui tak a, miropui tam tak te chu an ro rup a, an nunah nunhlimna reng neiin a hre thei lo. Duhamna leh itsika mit hlir an meng kual a, a der a nungin, a derin an dawh thei a. A der a ngaidamin, a der bawkin an in fak ni ber hian a hre thin! Hmui dawtheiin dawtin bum tur an zawng a, dawt a ni tih hre reng chung a, duham leh verther avanga lo awih dertu te chu an in lem tawn vel ni ber hian a hre thin. Mitin in duhthusam an sawi den den a, an duhthusam erawh a tak chang turin tha chhuah tak tak an tum lo ni hian a hre tlat thung si. Hmui daw thei an tam em em a, an lei an veng seng si lo. An duhthusam an sawi te umzui tum si lovin, an leiin thup, lehkhapuanin thupna an dap a, an za in an buai zo ta a ni berin a hre \hin!
MI PAKHATA PAHNIHTE
A hmangaih ber chuan thikthu awm miah lovin kuah vawng vawng se la, damchhung atana dai tawh lo tur hmangaihna thu hlan se a duh a ni. Rireh thawm chauh awmna hmunah, a malchunga pawma hmangaihna biahthu hlan a duh chu, a mitthla reng a, chu chuan a thinlungah phurna a pe fo thin. Dimtein a fawpa, a tih nat phal lo. Thinlung lairil atanga chhuak tuihnang chu a thlum a, a tak a, a nghet bawk tih a chiang a ni.
Hringnun thawnthu mawi tak an sawi a, nun awmzia an zir thiam dun thin a ni. Harsatna paltlang turin tuarchhel zirdan an zir a, an thiam theihloh chu an bul vela nungchangte nunphung atangin an zir fo thin.
Zan a Khuangchiri khuangchawi leh Vabak thirchher thawm, Sihal u leh Katkat hram ngaihnawm tak te chuan an nunah tuihnang a pe a, Chumchi lo leng chuai chuaite chu an tan a mawi a ni. Van a arsi de sep septe khian an chhungril nun kil tinah en na (Hlimna) an pe thin a ni. Hrangchhuana leh Chawngmawii lo lang thin hian hmangaihna thawnthu mawi a hrlh thin a, thla eng paw riai mai te hian leilung mawina a pholan zia a hriattir fo thin.
Khamrang inchhawrdawh pet put kar a, thingzar beng bungte hi an tan chuan thil satliah a ni mai lo va, an thinlung ti hlimtu leh an nun ti nuamtu berte an ni.
Khawvelah beiseina an neih tawh loh hnuah pawh, hlim takin beiseina thar an din dun ta a. Tuma tih buai leh pawlhbuai theih loh turin Khawvel thar din turin rilru thar an siam ta a ni.
A suangtuahna hmun atang chuan a a han har chhuak a, a tho hlawl a, khawilai thimtham zingah emaw ‘Dumde’ ah tal chandan te a awm mial lo maw? tiin, thimtham lam a pan a, lunglen, khawharna hmunah chuan zallenna a zawng a, a vak ruk ruk a, nun khawhar leh ruak a ni tih a hrechhuak a, a chau leh thin a ni.
“I anka ka nem reng ka tawng lo,
Hlim zai reng ka rel lo;
Puan ang min pawm thei si lo.”
tiin a van leh ruai thin si!
Chu hmun chu chawlhna atan beiseiin, “THLARAU KHAWHAR CHAWLHNA HMUN” a vuah ta a. Nimahsela; nun hah leh chau chawlhna erawh he leiah hian a hmu chuang lo a, chawlh hlenna awmna Van lam a thlir ta zawk a.
PAWI A THLEN HUN NGHAK SUH U!