Chief Minister Lalduhoma chuan SASCI leh fund danga thawh tur an thlan leh an kutthlak ve tawh chu a tha tur a ni tih sawiin hnathawhte chu a huna zawh ngei pawh an tum tlat tur tih a sawi.
Thawhlehni khan chief minister kaihhruaiin State Level SASCI Committee chu CM Conference Hall-ah an thukhawm a, hnathawh mek leh thawh tur thlan fel tawh te an thlirho.
Thutkhawmah hian chief minister chuan sorkar hian a thiltih tinrengah moral reforms a ngaihtuah thleng phak zel a, hna chhia te, sorkar hnathawk inthlahdah lutuk te an remtih loh thu a sawi.
SASCI leh fund danga thawh tur an thlan leh an kutthlak ve tawh chin chu a tha tur a ni tih sawiin Lalduhoma chuan, “A huna zawh ngei pawh kan tum tlat tur a ni a, revise ngai lo thei zel se kan ti bawk. Loh theih lohva revise emaw, hna zawh hun tur pawhsei a lo ngai emaw a nih pawhin Project Monitoring Committee-ten an endik hmasa zel ang,” tiin, hmasawnna hnathawhte hi a tir atangin monitoring committee hian a vil zel dawn thu leh mawhphurtute an tan tlan hle a ngai dawn tih a sawi a. Sorkar hmalakna tinrengah sorkar hnathawkten an thawhpui that avangin lawmthu a sawi bawk.
Thutkhawma tar lan a nih danin Mizoram sorkar chuan hmasawnna ruhrel pawimawh tak tak a thawh tur a thlan chhuah bik pariatte chu SASCI 2024-25 Part 1 atangin Rs. vbc 275 senga thawh a ni dawn a. Chung zingah chuan Central Jail bakah district jail pariatte thawm thatna turte pawh a tel.
Heng bakah hian state sorkar (UD&PA)-in hna a thawh that (reforms) avanga SASCI atanga pek (reform linked incentives) Rs. vbc 300 hmangin hmasawnna hna dang pakua a thawk bawk dawn a. Land reforms lama Mizoram sorkar (Land Revenue & Settlement) thawh that avangin central sorkarin SASCI part 7 atangin Rs. vbc 15.18 (incentive) a rawn pek hmangin hmasawnna ruhrel pathum thawh a ni dawn a. Hei bakah SASCI Part 10 (construction of working women hostel part) atangin Rs. vbc 127 hmuh hmangin hna thlan chhuah bik pasarihte thawh a ni dawn bawk.
SASCI 2024-25 hnuaia thawh tur tar lan thenkhatte hi sanction hmuh an ni hlawm tawh a. Hun tiam chhunga thawh zawh ngei tuma hmalak tura tih niin, hna thawh that (reforms) lawmman dawn theih dang te pawh dawn tumin hmalak mek a ni.
Nikum 2023-24 SASCI hnuaia hnathawh mek zingah Rs. vbc 500 senna, PWD hnuaia hna 117 zinga 91 chu zawh fel thawkhat an ni tawh a, hna dangte pawh zawh thuai beisei a nih thu tar lan a ni bawk.