World Cup-a France champion-puitu manager Didier Deschamps chuan nakuma United States, Canada leh Mexico-a inelna khelh zawhah a chawl dawn tih a sawi.
Kum 56 mi hi France coach ni rei ber ni tawhin kum 2012 atang khan an ram team a kaihruai.
Les Bleus hi 2018 World Cup-ah khan Russia-ah a champion-pui a, 2022 Qatar leh an rama Euro 2016 khelhah final a thlenpui bawk.
“Kum 2026-ah chuan a tawp tawh ang, chu chu ka chiang a ni,” tiin Deschamps chuan French broadcaster TF1 a hrilh.
“A sang ber thlenpui turin ka hun a liam tawh a. A pawimawh ber chu a sang bera kum tam tak chhung France dah hi a ni,” a ti.
France hian 2026 World Cup qualifying round an la khel tan lo va, March thlaa Nations League quarter-final-a Croatia an khelh result azirin an awmna tur group a chiang ang.
Midfielder thin, Deschamps hi Mario Zagallo leh Franz Beckenbauer dawta player leh manager ni chunga World Cup nomawi la thei hmasa ber niin kum 1998 khan captain niin France a lo champion-pui tawh a. Defensive midfielder hian ram tan vawi 103 zet a khel hman a ni.
Club tan pawh nomawi lian 14 zet lain Marseille leh Juventus tan Champions League bakah Chelsea tan FA Cup a la.